Broă lơh geh bơta tus bal bơh ală mat Đoàn Ơruh pơnu Kộng sản Hồ Chí Minh dà lơgar, Kwang đơng lam bồ càr, ală sở, ƀan, ngàñ mờ mờr 2 rơbô nă đoàn viên, ơruh pơnu ală jơi bơtiàn càr Dăk Lăk dê.

Tàm nùs nhơm yŭ rơ yùm bơh dơ̆ chu jrềng kah ưn ngài dê, Kwang đơng lam bồ Tỉñ đoàn càr Dăk Lăk yal tềng đap rùp hin ală cau ling khin cha jak chài, cau ling chơ̆t màng ală cồng nha neh lơh geh tàm poh “kis gĭt jơnau gĭt adat”, “hùc dà kah tô dà” bơh rơnàng kơnòm să gùt càr dê. Jat hơ̆, rơnàng kơnòm să càr Dăk Lăk neh lam lòt lùp còp, pà rlau 2 rơbô 700 bơnah phan pà ai ală hìu bơnhă cíñ sác, hìu bơnhă cau ling sồt să, cau ling kòp tê jê să, Cau Mè Việt Nam khin cha jak chài in mờ khà priă rlau 800 tơlak đong. Hòi jà rlau 500 nă đoàn viên ơruh pơnu tă pơgồp dong kờl, pơndờm pơnđiang, lơh niam wơl hìu ơm ai hìu bơnhă cíñ sác, cau ling sồt să, cau ling kòp tê jê să, cau pròc mhàm cau ling chơ̆t màng, hìu bơnhă geh màng mờ dà lơgar in; rlau 3 rơbô dơ̆ đoàn viên ơruh pơnu tus bal sền gròi ală ƀlàng tơ̆p ƀồc cau ling chơ̆t màng dê. Pơn jat hơ̆, ală kwang bàng ala mat bal mờ đoàn viên, ơruh pơnu neh kun bồ jơh nùs pơdơng bơkào, chu ñàng mờ chu jrềng tàm ală bơtô ƀồc cau ling chơ̆t màng in tàm Ƀlàng tơ̆p ƀồc cau ling chơ̆t màng càr dê.