VOV4.K’ho- Mang ngai 24/07, Ƀan Thường vụ Tỉñ đoàn Kon Tum bơyai lơh dơ̆ “Chu jrềng kah rơngal ală cau ling khin cha jak chài chơ̆t màng”. Do là dùl tàm uă broă lơh bơh rơnàng kơnòm să càr Kon Tum dê di tơngkah kir sơnrai 75 nam ngai Cau ling sồt să, cau ling chơ̆t màng (27/07).

Đoàn viên ƀòn dờng Kon Tum chu jrềng kah rơngal ală cau ling khin cha jak chài chơ̆t màng

Dơ̆ “Chu jrềng kah rơngal ală cau ling khin cha jak chài chơ̆t màng” geh Ƀan Thường vụ Tỉñ đoàn Kon Tum bơyai lơh yŭ rơyùm tàm 2 tiah tờm là Ƀlàng tơ̆p ƀồc cau ling chơ̆t màng càr mờ Hìu kah kơlôi cau ling chơ̆t màng Sư đoàn 10 tàm ƀòn dờng Kon Tum dê. Bal mờ hơ̆ tàm 47 broă lơh cih kah dà kơl hề cau ling chơ̆t màng tàm 10 kơnhoàl, ƀòn dờng càr dê, gĭt nđờ rơbô nă đoàn viên, ơruh pơnu 102 xã, sơnah ƀòn, thị trấn kung jơh nùs kun bồ bơyai lơh dơ̆ chu ñàng, pơdơng bơkào mờ chu rlau 7 rơbô nơm jrềng tơngŏ nùs nhơm gĭt ưn ngài uă ngan ală cau ling khin cha jak chài chơ̆t màng neh chơ̆t phi să tài bơh bơta lơngap lơngai is, bơta khat gơ boh bơh dà lơgar dê.

Rơnàng kơnòm să ling klàng chu jrềng kah rơngal ală cau ling khin cha chơ̆t màng

Tŭ do, càr Kon Tum geh 7 rơbô 479 bơ tô ƀồc cau ling chơ̆t màng geh tơ̆p tàm 10 ƀlàng tơ̆p ƀồc cau ling chơ̆t màng tàm càr. 5 nam do ală mpồl lơh broă geh gơnoar càr dê neh jòi tơrgùm geh 233 ƀồc ntìng cau ling chơ̆t màng. Gùt càr tŭ do geh 49 broă lơh cih kah dà kơl hề cau ling chơ̆t màng dê, tàm hơ̆ geh 10 ƀlàng tơ̆p ƀồc cau ling chơ̆t màng, 36 nơm tơrñang kah kơlôi cih mat cau ling chơ̆t màng mờ 3 Anih kah kơlôi cau ling chơ̆t màng.

Cau mblàng K’Hạnh