VOV4. K’ho- Pa do, Đoàn Ơruh pơnu Kộng sản Hồ Chí Minh bàr pe càr tàm tiah Tây Nguyên neh bơyai lơh Pơrjum dờng tơngai lơh broă bơh nam 2022-2027. Bơh hơ̆ pà gŏ, tơngai lơh broă pa do, broă lơh Đoàn mờ srơh ơruh pơnu, kơnòm pa tàu mờ kơnòm dềt tàm tiah do lời wơl uă tềl tơngŏ niam bơnĕ ngan, mờ uă broă lơh, bơnah broă geh ngan tàm tơl tiah.

Jat jơnau yal bơh Pơrjum dờng Đoàn Ơruh pơnu Kộng sản Hồ Chí Minh càr Gia Lai dơ̆ 15, tơngai lơh broă pa do, rơnàng kơnòm să càr dê neh lam lơh uă broă lơh geh ngan. Hơ̆ là ală srơh: “Ơruh pơnu tus bal dong kờl is kàl rơlô bơkang”, “Lơh tam gơl bơta kơlôi sơnơng, broă lơh tàm tiah làng bol kòn cau dùl ết nă cau nàng hời rơ hời brồ guh lik klàs rƀah kơ̆ kơljap”, “Rơnàng kơnòm să Gia Lai sơm bat tê bal sơr lèt gan kòp dờng”. Bơh hơ̆, lơh jat nùs nhơm lam lài tus bal dong kờl is bơh đoàn viên, ơruh pơnu dê.

Pơrjum dờng Đoàn Ơruh pơnu Kộng sản Hồ Chí Minh càr Gia Lai dơ̆ 15

Di dơ̆ do, Ƀan Thường vụ Tỉñ Đoàn Gia Lai neh bơyai lơh broă lơh jờng rơ ală mpồl cau, cau dùl nă să is geh cồng nha jak ngan tàm broă lơh Đoàn mờ srơh ơruh pơnu, kơnòm pa tàu mờ kơnòm dềt tơngai lơh broă bơh nam 2017 -2022. Ngan ngồn, neh geh 27 nă cau mờ 28 mpồl cau geh jờng rơ; Củ tịc Ủy ƀan Ñân zân càr Gia Lai pà Bằng khen ai 5 mpồl cau mờ 10 nă cau dùl nă să is in, neh geh cồng nha jak ngan tàm broă lơh Đoàn mờ srơh ơruh pơnu, kơnòm pa tàu mờ kơnòm dềt.

Bi Lê Thế Đô, Ƀí thư Huyện đoàn Chư Prông geh Ủy ƀan Ñân zân càr Gia Lai pà Bằng khen đơs: Tàm tơngai bơh nam 2017-2022 geh ală bơta kal ke tàm bơrlŭ bal, ngan là kòp aniai, mơya mờ bơta lơh ngan jơh ñùs uă ngan bơh rơnàng kơnòm să càr Gia Lai dê neh lơh geh ală cồng nha niam ngan tàm broă lơh đoàn mờ srơh ơruh pơnu, kơnòm pa tàu mờ kơnòm dềt. Ngai do să tờm añ chờ hờp ngan là kwang bàng đoàn geh jờng rơ den să tờm añ chờ hờp ngan, mờ sền hơ̆ là bơta gơn kơnờm nàng pơnđơl pràn lơh ngan, tă pơgồp bơta pràn ai broă lơh đoàn mờ srơh ơruh pơnu, kơnòm pa tàu mờ kơnòm dềt bơh càr dê in ngai sơlơ bơtàu tơnguh.

Mờ jơnau sồr lơh broă “Tam klăc bal- lam lài- ngăc ngar- bơceh pa- bơta kơ̆p kờñ”, Pơrjum dờng Đoàn Ơruh pơnu Kộng sản Hồ Chí Minh càr Gia Lai dơ̆ 15 ai tơlik 13 broă jàu tờm tơngai lơh broă bơh nam 2022-2027. Dùl tàm ală tơngume là lơh jat geh cồng nha ală broă lơh, gùng dà broă lơh dong kờl, dong kờl ơruh pơnu ờ pràn; pơn jat tai lơh jat niam ală broă lơh dong kờl kòn bơnus, tus bal dong kờl is tàm ƀòn lơgar nàng pơgồp bơnah tàm broă lơh tơn jơh jơgloh tơrmù rƀah mờ bơt bơtàu ƀòn lơgar pa tàm tiah do dê. Bi Lê Trọng Phúc, Ƀí thư Huyện đoàn Đức Cơ đơs: Kơ̆p kờñ gơwèt mờ srơh lơh broă lơh jat broă lơh ơruh pơnu mờ ală broă lơh lòt bal mờ ơruh pơnu, ngan là broă  mŭt lơh broă mờ sơnđờm mŭt lơh broă nàng lơh geh ală bơta ai ơruh pơnu in geh tŭ niam nàng brồ guh mờ dờng pràn. Kơ̆p kờñ ală cau ala mat jak ngan tơl bơta pràn jak, jơh nùs nhơm, ai broă lơh đoàn mờ srơh ơruh pơnu bơh càr dê ngai sơlơ bơtàu tơnguh.

Dăk Lăk jờng rơ 25 broă lơh mờ 34 nă kwang bàng đoàn pơnrơ jak

Ndrờm bè hơ̆ sơl, tàm poh lài, Đoàn Ơruh pơnu Kộng sản Hồ Chí Minh càr Dăk Lăk kung neh bơyai lơh Pơrjum dờng cau ala mat dơ̆ 12, tơngai lơh broă bơh nam 2022-2027. Tềl tơngŏ tàm 5 nam do bơh rơnàng kơnòm să càr Dăk Lăk dê là neh lơh geh rlau 6 rơbô broă lơh, bơnah broă ơruh pơnu mờ kờp jơh priă tă mờr 97 tơmàn 500 tơlak đong. Mpồl kwang bàng Đoàn ală kấp sùm lơh jat nùs nhơm geh kơnòl, lơh krơh niam, lam lài, jơh nùs nhơm mờ srơh, jơh nùs jơh tồr tài bơh Đoàn viên ơruh pơnu, là bơta tờm ngan pơlam ală srơh tàm pơrlòng kờñ gơboh dà lơgar tàm rơnàng kơnòm să dê. Di dơ̆ do, Tỉñ đoàn Dăk Lăk neh jờng rơ 25 broă lơh ơruh pơnu mờ 34 nă kwang bàng Đoàn pơn rơ jak tơngai lơh broă bơh nam 2017-2022.

Bi Lương Thị Nga, ƀí thư đoàn xã Ia Rvê, kơnhoàl Ea Súp, geh jờng rơ tàm dơ̆ do, đơs: Să tờm añ chờ hờp ngan mờ hờn chờ uă. Dơ̆ 2 là gơ lơh pơn yờ să mờ bơtoah ngan là să tờm añ neh geh khà jờng do mờ kơ̆p kờñ là tàm tơngai lơh broă tus do mờ tàm tơngai  tus den să tờm añ geh pơnđơl pràn lơh ngan rlau tai, pơnđơl pràn rlau tai nàng di pal mờ mờ sră jờng rơ mờ añ neh dờp geh, nàng tơrgùm wơl đoàn viên, ơruh pơnu tàm mpồl Đoàn dê. Do là dùl broă lơh, là bơta pơnđơl pràn lơh ngan bơh ờ gŏ di bơh Đoàn dê lơm gời mờ là jơh bal mpồl đoàn pơgồp bal mờ gơ̆p dong kờl bal, nàng mblàng yal đoàn viên, ơruh pnu in mŭt lơh broă.

Lài hơ̆, Đoàn Ơruh pơnu Kộng sản Hồ Chí Minh càr Dăk Nông là mpồl sơn rờp ngan tàm tiah Tây Nguyên dê neh bơyai lơh Pơrjum dờng tơngai lơh broă bơh nam 2022-2027. Dùl tàm ală broă lơh pơn rơ ngan rlau jơh bơh rơnàng kơnòm să Dăk Nông dê là tus bal bơt bơtàu ƀòn lơgar pa. Ală kấp ƀộ Đoàn neh lơh mờr 7 rơbô broă lơh, bơnah broă ơruh pơnu mờ kờp jơh priă jền rlau 38 tơmàn đong. Rơnàng kơnòm să càr Dăk Nông kung tam pa rlau 700 rơbô tờm chi; bơt bơtàu 127 anih pơrjum, nhơl chờ ai ơruh pơnu, kơnòm pa tàu mờ kơnòm dềt in; bơyai lơh uă broă lơh dong kờl kơnòm dềt kal ke mờ kờp jơh khà priă rlau 15 tơmàn đong.

Mờ jơnau sồr lơh broă: “Rơnàng kơnòm să càr Dăk Nông lam lài, bơta kơ̆p kờñ, bơceh pa, bơtàu tơnguh”, Pơrjum dờng Đoàn Ơruh pơnu Kộng sản Hồ Chí Minh càr Dăk nông dơ̆ 4, tơngai lơh broă bơh nam 2022-2027 neh ai tơlik 12 mpồl broă jàu, 8 rơndap broă lơh, broă lơh tờm mờ kràñ cê jơh nùs lơh bơta kơ̆p kờñ gơ gơs ală broă lơh cèng wơl cồng nha geh ngan. Pal sền gròi ngan là ală jơnau kờñ bè: pah nam tam pa 250 rơbô tờm chi; dong kờl 10 thôn, ƀòn kal ke lơh sir broă jàu ƀòn lơgar pa; dong kờl 200 tơmàn đong ai ơruh pơnu càn priă sơnđờm mŭt lơh broă; kờp bal pah nam tơrmù rlau 6% hìu bơnhă rƀah ơruh pơnu làng bol kòn cau dùl ết nă cau in.

VOV Tây Nguyên/K’Hạnh mblàng