Pơrjum neh đơs tus ală bơta tờm lơh gơtìp tus mờ broă rơndăp săp sèng, tam gơl pa ală kông ty lơh sa suơn sre brê bơnơm tàm càr Dăk Lăk ờ geh cồng nha. Jăt mờ hơ̆, geh ờ uă gùng dà broă lơh geh ai gam gơtìp kal ke, ờ tơl, lơh gơrềng ờ niam tus mờ mpồl lơh sa kă bro bal mờ cau dờp ù tiah lơh broă sa. Mpồl phan lơh broă atbồ bè ù tiah, bè brê ờ hềt lơh gơs, ờ hềt di pal mờ jơnau kờñ mùl màl.

Ală kông ty lơh sa suơn sre, brê bơnơm ờ lơh jăt niam broă atbồ, sền gàr ù mờ brê geh jào. Geh ờ uă kông ty ring bal is mờ ală mpồl lơh broă, cau dùl nă să ơpah wơl ù tŭ ờ hềt geh gùng dà broă ai lơh bơh càr dê. Broă sền wơl khà ù nàng tam gơl ai gơnoar atbồ tiah in atbồ lơh ờ hềt di pal mờ lơh gơtìp yal yă jŏ tơngai. Ồng Nguyễn Đình Trung, Ƀí thư Tỉñ ủy càr Dăk Lăk dờp, broă rơndăp săp sèng, tam gơl pa ală kông ty lơh sa suơn sre brê bơnơm tàm tơngai do ờ hềt geh di jăt mờ ală jơnau geh ai tàm Nghị quyết sồ 30 nam 2014 bơh Ƀộ Cíñ trị dê. Càr pal song dơ pă sền wơl bè bơta mùl màl ală kông ty lơh sa suơn sre brê bơnơm nàng geh ală broă lơh bal mờ ală jơnau đơs di pal nàng pơyoa Ƀộ Cíñ trị, Cíñ phủ, Quốk hội in.