Ƀòn dờng Dà Làc bơh lài do neh gơs ƀòn dờng lòt nhơl ơm rơlô să geh pơnrơ ngan, geh uă cau git tus ală măt sơnđan ndai bè “Ƀòn dờng mhoal”, “Ƀòn dờng rơbô tờm nho”, “Ƀòn dờng rơbô bơkào”, “Ƀòn dờng Paris tơrgùm dềt”… Mơya, tài bơta kờñ bơtàu tơnguh mhar ir bơh tiah drà tàm 2, 3 jơ̆t nam pa do neh lơh gơlik uă bơta ờ niam, gơrềng ờ kơl jăp tus mờ ƀòn dờng Dà Làc dê. Tàm hơ̆, ală bơta tàm dơlam is ƀuơn ngan gŏ hơ̆ là bơta kòl rơndeh tàm ờ uă gơl gùng, gơbam dà tŭ trồ mìu, mhoal rơhời ờ hoan geh tai, broă lơh phan lời wơl gơtìp sơgràm aniai, bơta tơlir tàm dơlam tiah drà ờ hoan geh tai…

Jăt Kiến trúk sư ồng Ngô Viết Nam Sơn, do là cau neh ai uă nam kơlôi sơnơng bè tiah drà Dà Làc, ală bơta gơrềng ờ niam do pal geh kah ngan tŭ kơlôi sơnơng lơh wơl rơndăp ù tiah bal ƀòn dờng Dà Làc bal mờ tiah rềp bal tus nam 2045. Tàm hơ̆ uă ngan là pal rề ơnàng ù tiah bơtàu tơnguh nàng prăp gàr mờ lơh wơl tiah ờ niam ƀòn dờng tŭ do, bơtàu tơnguh ƀòn dờng Dà Làc jăt gùng dà tiah drà tơlir. Kiến trúk sư ồng Ngô Viết Nam Sơn đơs nền: “Tiah tàm dơlam tŭ do ƀê tông mờr jơh bloh, tiah tơlir gam tai ờ geh uă den tàng broă lơh jŏ jòng tŭ do jơh ală tiah tơlir gam gơlời pal geh sền gàr mờ jơh ală bơta. Dơ̆ bàr, pal bơtàu tơnguh tiah tờm pa, do là dùl bơta lòng dờng ngan gơwèt ƀòn dờng Dà Làc, gơwèt càr Lâm Đồng dê. Lài do he đơs là prăp gàr tiah lời wơl niam chài, mơya nđan lah he ờ lơh, là tài he ờ geh tiah drà pa lơi. Añ kơ̆p kờñ broă pơlam bơh rơndăp broă ù tiah dơ̆ do geh lơh loh bơta do”.

Di bal mờ jơnau đơs do, Kiến trúk sư ồng Trương Văn Quảng, lơh broă tàm Mpồl rơndăp ù tiah bơtàu tơnguh tiah drà lơgar Việt Nam đơs là, tềng đăp broă lơh geh tiah drà jơh gam lơh pràn bè tŭ do, broă rơwah bơta bơtàu tơnguh tiah drà ƀòn dờng Dà Làc pal geh ndrờm bal tàm broă bơtàu tơnguh tiah niam ù tiah geh is, broă lơh niam là pal geh mờ kwơ màng ngan. Pal geh ai tiah lơh sa suơn sre, lơh geh wơl bơta bơtàu tơnguh đah tờm nho tàm do mờ lơh kis wơl bơta niam ƀòn dờng tàm brê, brê tàm ƀòn dờng. Kiến trúk sư ồng Trương Văn Quảng pà git: “Sền gàr mờ lơh geh sùm bơta niam ƀòn dờng tàm brê, brê tàm ƀòn dờng den bơta do añ đơs là kwơ màng ngan, kal ke ờ gŏ di là ờ gơtùi lơh. Tàm tơngu me hơ̆ den he geh bơta niam nàng jờng rơ ală bơta kwơ tờm, geh pơnrơ tàm bơta niam tiah drà ƀòn dờng Dà Làc mờ tiah rềp bal gơs dùl tiah drà phan lời wơl, lòt nhơl geh khà dunia”.

Jăt Kiến trúk sư ồng Trần Ngọc Chính, Củ tịc Mpồl Rơndăp ù tiah bơtàu tơnguh tiah drà lơgar Việt Nam yal, nàng prăp gàr bơta krơi is ƀòn dờng Dà Làc dê jăt tơngai, wèt tus jơnau kờñ gơguh lơh sa tơlir mờ rơcang kơrian tam gơl trồ tiah, kờñ ngan geh dùl gùng dà broă lơh jŏ jòng, geh bal ală gùng dà broă lơh krơi is mờ ndrờm bal. Ồng Trần Ngọc Chính pà git: “Tŭ do kờñ gàr geh ƀòn dờng Dà Làc den pal lơh bè lơi? Di lah lơh jăt broă lơh, lơh roh ù tiah niam, ù tiah geh is ha là khà kờp làng bol gơguh gal ir den gam là ƀòn dờng Dà Làc tai lah ờ? Dùl tàm ală ƀòn dờng ñhoa tàm dunia, ñhoa 1 rơbô 500 thơ̆k pơn drờm mờ măt dà lềng mơya mìu kung gam gơtìp gơbam dà den bơta do he pal lơh loh, tàm tơngu me hơ̆ den geh lơh nền nòn tàm broă rơndăp ù tiah bal. Dà Làc niam là tài Dà Làc tàm brê – brê tàm Dà Làc, kờñ gàr geh Dà Làc den he pal geh rơndăp ù tiah”.

Kơnòl lơh tơrgùm wơl rơndăp ù tiah bal ƀòn dờng Dà Làc mờ tiah rềp bal neh geh Thủ tướng Cíñ phủ kĭ tàm Kơrnoăt sồ 257, ngai 17 nhai 3 nam 2023. Jăt mờ hơ̆, ù tiah, tiah nhàr mờ bơta kơlôi sơnơng geh jơh ù tiah ƀòn dờng Dà Làc bal mờ ală kơnhoàl Lạc Dương, Đơn Dương, Đức Trọng bal mờ dùl bơnah ù tiah kơnhoàl Lâm Hà, rề ơnàng jăt bơta ñhoa bơh 850 thơ̆k rơlao hờ đang pơn drờm mờ măt dà lềng; bă ù nhàr rơndăp ù tiah geh lơh tus 336 rơbô lồ, ơnàng rơlao mờr 10 dơ̆ mờ bă ù tiah ƀòn dờng Dà Làc tŭ do.

Ồng Phạm S, Phó Củ tịc UɃÑZ càr Lâm Đồng pà git, do là gùng dà broă lơh rơndăp ù tiah jŏ jòng bè broă bơyai lơh ù tiah, bơta niam ù tiah tàm dơlam tiah drà, tàm hơ̆ kơnòl bơsong ală bơta gam gơlik geh bơh broă lơh jăt rơndăp ù tiah neh geh kĭ. Tŭ do càr Lâm Đồng gam iăt ală jơnau đơs pơgồp bal, dong kờl càr Lâm Đồng geh tơl jơnau tơngit mờ tơngu me ai geh gùng dà broă lơh krơi is ai ƀòn dờng Dà Làc in. Ồng Phạm S, Phó Củ tịc UɃÑZ càr Lâm Đồng pà git: “Dà Làc geh 3 bơta dờng ngan tàm khà dunia dê, lài ngan là bơta ñhoa ù tiah, dơ̆ bàr là bă ù, dơ̆ pe là khà kờp làng bol ờ gal, tàm pơgăp 68 nă tàm 1 kơi sồ vuông. Pe bơta do là bơta tờm nàng rề ơnàng bơtàu tơnguh ù tiah uă ngan gơwèt mờ ƀòn dờng Dà Làc dê tàm boă bơ̆t bơtàu tiah drà, tam gơl trồ tiah geh ai tàm tơngai tus. Càr Lâm Đồng sùm iăt jơnau pơgồp bal bơh ală cau jăk chài, ală cau khoa họk geh nùs nhơm niam mờ Dà Làc, lơh broă bal mờ Dà Làc – Lâm Đồng dê nàng bơ̆t bơtàu Dà Làc tàm tơnơ̆ do gơs ƀòn dờng geh khà niam, là tiah tờm tiah drà ơm rơlô să dà lơgar mờ dunia dê gơdờp mờ tam gơl trồ tiah, ƀòn dờng tơlir”.

Ală nam do, ƀòn dờng Dà Làc neh bơtàu tơnguh jăt gùng dà rơndăp ù tiah bal neh geh Thủ tướng Cíñ phủ kĭ tàm Kơrnoăt sồ 704, ngai 12 nhai 5 nam 2014 mờ neh geh lơh geh uă cồng nha pơnrơ ngan tàm jơh ală gah broă. Mơya, broă bơtàu tơnguh tiah drà kung geh ai uă bơta pal geh bơsong bè: khà kờp làng bol mờ khà cau năc lòt nhơl ngai sơlơ gơguh tàm tŭ ƀòn dờng ờ hềt kơlôi sơnơng rề ơnàng ù tiah lơh tiah drà; ờ geh pơgồp bal đah ală tiah drà tờm mờ ală tiah drà rềp bal; bơta geh, bơta pràn ờ hềt geh lơh jơh… Kơ̆p kờñ bơh dơ̆ lơh niam wơl rơndăp ù tiah do geh dong kờl ai geh uă bơta pràn pa, dong kờl ƀòn dờng Dà Làc bơtàu tơnguh di pal mờ bơta geh mờ prăp gàr geh ală bơta niam krơi is bơh ƀòn dờng lòt nhơl ơm rơlô să dờng niam, ƀòn dờng tơlir tàm tiah kơh bơnơm Lâm Viên dê.