Do là càr dơ̆ 31 gùt lơgar dê mờ là càr sơnrờp ngan tiah Tây Nguyên dê lơh gơs sră nggal lùp sền nền Rơndăp ù tiah kấp càr. Rơndăp ù tiah càr Dăk Nông ai geh 7 jơnau tơnguh bơtàu, jơnau kờñ tus nam 2030 bơ̆t bơtàu càr Dăk Nông gơs càr geh broă lơh sa pràn mờ kơl jăp tiah Tây Nguyên dê, là tiah tờm lơh sa mờ măi mŏk bauxit – trà dà lơgar dê, tiah tờm năng lượng geh lơh wơl tiah Tây Nguyên dê; Tơnguh bơtàu lòt nhơl ơm rơlô să, bơta niam brê bơnơm ai geh bơh bơta pràn bè trồ tiah, ù tiah niam; Tơnguh bơtàu lơh sa suơn sre jăt broă lơh kông nghệ kao, kơl jăp.

Wèt tus nam 2050, lơh ngan càr Dăk Nông gơs càr tơnguh bơtàu tiah Tây Nguyên dê, geh priă tơl nă làng bol uă rơlao mờ khà geh bal gùt lơgar dê. Càr Dăk Nông ai gùng dà lơh geh 3 broă lơh tàm tàm broă tơnguh bơtàu, bè: Mpồl lơh sa mờ măi mŏk bauxit – trà – lơh lòs mờ lơh sa mờ măi mŏk năng lượng kloh; Lơh sa suơn sre kơl jăp gơdờp bal mờ tam gơl trồ tiah pơgồp bal mờ drà kă bro; Lòt nhơl tàm tiah niam brê bơnơm, ơm rơlô să pơgồp bal mờ bơta niam ù tiah geh is, mpồl bơtiàn mờ kông viên địa cất gùt plai ù UNESCO. Càr tơnguh bơtàu broă lơh geh 11 tiah drà gơwèt 3 tiah pràn, 4 tiah jăt gah lơh sa jăt ală gơl gùng 14, 14C, gùng 28 mờ ală gơl gùng đah măt tơngai lik – đah măt tơngai mŭt. Càr Dăk Nông kung ai geh 14 mpồl broă lơh mùl màl nàng hòi jà bơta pràn lơh jăt broă rơndăp lơh neh geh ai.