VOV4.K’ho- Ngai 15/4, tàm hìu lơh broă Cíñ phủ, Phó Thủ tướng ồng Lê Văn Thành neh đơng lam pơrjum pờ tơlik tơn tàm internet mờ ală càr, ƀòn dờng bè lơh sir rơndap ù tiah bơtàu tơnguh ồs đèng dà lơgar tơngai bơh nam 2021 tus nam 2030, broă wèt sền tus nam 2045, gam hòi là rơndap ù tiah ồs đèng 8.

Đơs pơn dut pơrjum, Phó Thủ tướng ồng Lê Văn Thành đơs niam ală jơnau đơs tàm pơrjum mờ đơs là, ală jơnau đơs ai tơnggŏ bơta jơh nùs, geh kơ nòl, lơh jat tơngume pơrjum, tă pơgồp uă jơnau đơs niam ngan, geh kuơ bè jơnau rơcang cih rơndap ù tiah ồs đèng 8. Bè hơ̆ den tàng rơndap ù tiah ồs đèng 8 geh mpồl bơtiàn dunia mờ ală càr, ƀòn dờng, mpồl lơh sa kă bro, cau bơcri priă kơp kơn ngan nàng ai tơlik lài gùng dà bơcri priă bơtàu tơnguh gah năng lượng đơs bal, ồs đèng đơs is tàm tơngai tus. Phó Thủ tướng ồng Lê Văn Thành đơs loh ơn bơta kuơ dà lơgar, jơi bơtiàn dê lài ngan rlau jơh, lài ngan là gùng dà geh lơh sùm tàm broă đơng lam lơh sir rơndap ù tiah ồs đèng 8 bơh Cíñ phủ, Thủ tướng Cíñ phủ dê.

Cau mblàng K’Duẩn