Nggùl nam do, hìu ồng Lê Huy Dũng, kis tàm ƀòn drà dềt Lộc Thắng, kơnhoàl Bảo Lâm, càr Lâm Đồng gơtìp tàm bơta ờ geh hìu ơm. 5 nă cau tàm hìu pe rơnàng pal tam jà bal lòt ơpah hìu ơm, rài kis gơtìp kal ke ngan. Bơta tờm là hìu bơh ală cau tàm hìu do dê neh gơtìp sèt uă ngan den tàng pal sờr. Tàm tŭ bơyai lơh ală sră nggal nàng lơh hìu pa den gơnoar atbồ ƀòn lơgar ờ ai lơh tài jơh ală bă ù bơh hìu nhă dê ndrờm gơmŭt bal tàm rơndăp ù tiah phan kwơ tàm ù. Ồng Lê Huy Dũng pà git: “Dan mờ Cíñ phủ ai geh sră nggal lơh thoàr ha là lơh wơl, ha là tam gơl nàng làng bol bol añ geh rài kis jŏ jòng, iang lơh broă sa. Mùl màl geh ù mờ ờ gơtùi lơh hìu, ờ geh hìu den bol añ ờ git lơh bè lơi, kal ke mờ glar bòl ngan”.

Hìu mò Phạm Thị Năm, kis tàm sơnah ƀòn Lộc Tiến, ƀòn dờng Bảo Lộc, càr Lâm Đồng kung gơtìp ndrờm bal mờ bơta bè do sơl. Hìu ơm, ù tam phan bơh hìu nhă mò dê gam bè ờs, di mờ adăt boh lam, geh lơh tàm ƀòn gal cau ơm kis tơn ni sơna gơtìp “kơrian”, ờ gơtùi tam klah pà ală oh kòn in ha là ai bă ù do càn priă mờ ngân hàng nàng bơcri tàm broă lơh sa. Mò Phạm Thị Năm pà git: “Sơnah ƀòn Lộc Tiến bol añ geh ală hìu gal kòn ngan, kis bal bơh 03 tus 04 rơnàng mơya ờ gơtùi tam klah bă ù nàng pà ală kòn in lik ơm kis. Geh uă hìu kờñ bơtàu tơnguh lơh sa, kờñ càn priă ngân hàng kung ờ gơtùi càn tài gơtìp kal ke bơh Rơndăp ù tiah. Tàm hơ̆ is ồn ngan tŭ do, uă hìu làng bol neh ờ kơl jăp tai uă ngan, mơya kờñ lơh niam wơl kung ờ gơtùi sơl”.

Jăt Jơnau lơh nền sồ 866 ngai 18 nhai 07 nam 2023 bơh Thủ tướng Cíñ phủ dê bè broă kĭ Rơndăp ù tiah jòi sền, lơh, lơh gơs mờ ngui ală bơta phan kwơ tàm ù tơngai bơh nam 2021 tus 2030, wèt tus nam 2050, tàm càr Lâm Đồng geh rơlao 70 rơbô lồ ù gơtìp rơndăp ù tiah rơndăp bal, lơh gơrềng tus mờ git nđờ jơ̆t rơbô hìu làng bol mờ mờr 100 rơbô nă cau. Jăt ồng Võ Ngọc Hiệp, Phó Củ tịc Anih duh broă Làng bol càr Lâm Đồng đơs, broă rơndăp ù tiah phan kwơ gơtìp rơndăp bal tàm ƀòn ơm kis ờ mìng lơh gơtìp tàm bơrlŭ, lơh kal ke tus mờ broă lơh sa bal mờ rài kis bơh làng bol dê mờ gam lơh broă lơh ală rơndăp broă bơtàu tơnguh lơh sa mpồl bơtiàn càr Lâm Đồng dê gơtìp ơm ờ gơtùi lơh. Ồng Võ Ngọc Hiệp pà git: “Nàng gàr niam broă bơtàu tơnguh kơl jăp den bal sền wơl mờ bơsong bơta kal ke tàm rơndăp bal broă rơndăp ù tiah lơh, jòi phan kwơ tàm ù. Jơh rơlao 50% bă ù tàm tiah tàm gùl kơnhoàl Bảo Lâm, dùl bơnah bơh ƀòn dờng Bảo Lộc dê kung gơwèt tiah tàm gùl, hơ̆ sồng ală rơndăp broă bơcri priă dà lơgar, uă tiah bơtàu tơnguh… ndrờm gơtìp rơndăp bal tàm tiah rơndăp ù tiah jòi sền, lơh, lơh gơs phan kwơ tàm ù. Tŭ do jơh ală broă lơh ndrờm gơtìp ơm ing jơh, geh bal ală tiah drà, tiah ƀòn ơm kis, tiah lơh wơl ƀòn ơm kis”.

Gŏ loh làng bơta kal ke bơh Rơndăp ù tiah phan kwơ tàm ù jăt Jơnau lơh nền sồ 866, tàm dơ̆ tus lơh broă nhai 08 nam 2024 tàm càr Lâm Đồng, Thủ tướng Cíñ phủ ồng Phạm Minh Chính neh sồr Ƀộ Phan geh is mờ Tiah kis mhar sền wơl mờ bơsong. Thủ tướng Cíñ phủ ồng Phạm Minh Chính đơs: “Do là gơkòl adăt boh lam, den tàng Ƀộ Phan geh is Tiah kis pal tơrgùm wơl, ai tơmŭt bal nàng lơh tam gơl wơl Adăt Phan kwơ tàm ù, tàm hơ̆ uă ngan là ală bơta ờ di mờ mùl màl mờ lài do he neh lơh. Tŭ do ờ hềt lơh geh phan kwơ tàm ù den pal ai làng bol in ngui ù tàm bă ù geh phan kwơ tàm ù nàng lơh broă, nàng tam phan, nàng geh kis niam, gam tŭ lơi lơh phan kwơ tàm ù den kơlôi wơl tơnơ̆. Tàm do, tŭ geh rơndăp ù tiah phan kwơ tàm ù den pal kong gơtìp, di bè hơ̆ den làng bol kis mờ broă lơh lơi? Hơ̆ là ală bơta ờ di mờ mùl màl”.

Mờ jơnau sồr bơh Thủ tướng Cíñ phủ dê, làng bol càr Lâm Đồng gam kơ̆p gơn ngan ală anih lơh broă gơrềng bal mhar bơsong ală bơta gơkòl ờ di pal tàm rơndăp ù tiah phan kwơ tàm ù nàng lơngăp lơngai rài kis, bơtàu tơnguh lơh sa mpồl bơtiàn ai làng bol in.