VOV4.K’ho- Tềng đap bơta rơngô ù gơlik geh sùm tàm ù tiah kơnhoàl Kon Plông, càr Kon Tum, ngai 26/04, Mpồl lơh broă bơh Ƀộ Xây dựng neh tus sền bơta geh ngan tàm bàr pe broă lơh bơt bơtàu tàm tiah rơngô ù tàm kơnhoàl Kon Plông mờ geh dơ̆ lơh broă mờ Ủy ƀan Ñân zân càr Kon Tum.

Thứ trưởng Ƀộ Xây dựng ồng  Lê Quang Hùng đơs tàm dơ̆ lơh broă mờ Ủy ƀan Ñân zân càr Kon Tum

Tàm dơ̆ lơh broă mờ Ủy ƀan Ñân zân càr Kon Tum, jat tàm ală jơnau yal, jơnau đơs, khà kờp geh tŭ do, Thứ trưởng Ƀộ Xây dựng ồng Lê Quang Hùng đơs là, nàng geh cơng tàng sền sơwì bè bơta rơngô ù, den sồr Viện Hàn lâm khoa họk Việt Nam, Viện khoa họk kông nghệ- Ƀộ Xây dựng lam crăp tai ală măy sền gròi nàng lơh sir broă lơh đo, was rơngô ù tàm tiah lơh anih sền gròi rơngô ù tàm tơngai tus... Gơwèt mờ Ủy ƀan Ñân zân càr Kon Tum, gơnoar atbồ tiah do pal gờñ sồr ală cau tờm sền gàr bơtơ̆t dơng dà lam lơh kờp sền, lòt sền wơl bơta ờdo ờdă bơtơ̆t dơng dà nàng geh gùng dà broă lơh rcang sơndră wơl; bơto pơlam làng bol bơsong ală jơnau gơbàn tŭ rơngô ù gơlik geh.

Cau mblàng K’Hạnh