VOV4.K’ho- 2 nam 2020-2021, là tơngai geh cồng nha ngan bơh tiah Tây Nguyên dê tàm broă hòi jà bơcri priă dilah kờp jat priă jền bơh ală rơndap broă lơh geh lam lơh. Tàm hơ̆, mìng is ală rơndap broă lơh đèng càl, neh bơcri tàm tiah do in rlau 85 rơbô tơmàn đong, bal mờ gĭt nđờ bơta gơn kơnờm bè cồng nha lơh sa, mpồl bơtiàn. Mơya, tŭ tơngai lời ai ală rơndap broă lơh do in neh jơh, Tây Nguyên den là tiah kal ke ngan bơh uă bơta gam gơ kòl, ờ niam. Ală rơndap broă lơh tơ mut bal tàm gùng che ồs đèng dờp dong kờl giă FIT bơh Cíñ phủ dê, kung ờ ngan ngồn geh cồng nha sơl, ală rơndap broă lơh ờ gơtùi lơh geh do sơlơ gơ gơs là bơtaàñ ơnòng kơn jơ̆ bơh mpồl lơh sa kă bro dê... bal mờ uă bơta lơh tìs bơh broă lơh dùl ết, lơh tìs, gam kơ̆p bơta lùp sền mờ lơh glài.

Tàm gơl gùng rơndeh dờng 14- Gùng Hồ Chí Minh gơl lòt gan kơnhoàl Dăk Song, càr Dăk Nông, ală tourbin đèng càl kò ngan jòng jơnhoa rlau gĭt nđờ rơhiang thơk, mơya ơm bè hơ̆ sùm tàm ù tiah dòr bơnơm tơrlir. Sùm uă nhai do, bulah càl dờng halà càl dềt, ală tourbin do kung gam gơ ơm gời bè hơ̆, ờ pờ geh dùl kilo oát jiơ đèng lơi sơl. 

Ală jrong đèng rơhiang tơmàn gơ ơm tàm bơta gu ră sa tàm Tây Nguyên

Tiah đah mat ù, ală bơnah ù tiah bơnơm gơtìp cò pơnring kung gam tơrgùm sồr lồng sơrlàng jrong đèng càl mờ nđar puh, ală rơndeh rơndồ mut lơh broă den gơ lơh bè ờ gŏ jơh. Ồng Chẩu Văn Sơn, Kwang atbồ Kông ty TNHH MTV năng lượng Dăk N’Drung 1, 2 mờ 3 pà gĭt, mpồl lơh sa kă bro mìng bơcri rlau 15 rơbô tơmàn đong tàm do, ơn bơta gơn kơnờm tàm broă lơh sir, mut lơh mờ tàm tơrbŏ lơh sir lài mờ ngai 31/10/2021 mờ geh tăc đèng mờ giă 1 rơbô 928 đong dùl ki lo oát jiơ. Mơya, kông ty sơr băc mhar sền gŏ he neh ờ lơh gơtùi. Lồi nhai 10 nam lài, mìng geh bàr pe jrong đèng tàm kờp jơh 89 nơm jrong geh lơh sir. Bơh hơ̆ tus tŭ do, mpồl lơh sa kă bro pal tam gơl jơh broă lơh bơcri priă, bơh lơh mhar ngan nàng lơh geh priă jền uă, tus lơh lơyài  wơl ngan nàng gam geh lơh broă.

Ồng Chẩu Văn Sơn đơs: Tơnơ̆ ngai 31/10/2021 tŭ mờ ờ geh giă FIT tai den tơngai mut lơh đah he dê lơyài rlau tơn. Tài bơh neh jơh tơngai giă FIT rao, dilah mờ lơh mhar jat tơngai den sơlơ hoàc huơr rlau tai, lơh lơyài wơl nàng tơrmù giă lơh.

Kung tàm pơrlòng ờ geh cồng nha mờ tơngai pơrgon lơh gơs là ngai 31/10/2021, Hìu măy đèng càl Nam Bình 1 (kơnhoàl Dăk Song, càr Dăk Nông), gam kong hoàc huơr uă ngan. Ồng Lê Văn Tiến, Phó Kwang atbồ Hìu măy đèng càl Nam Bình 1, pà gĭt: Neh lơh sir mờr 1 nam, mơya jơh hìu măy rlau 1 rơbô tơmàn đong kung gam ơm gời lơm. Kờp bal pah nhai mpồl lơh sa kă bro kung gam pal tă priă nàng lơh broă hìu măy mờ kờp dŭ hoàc huơr là 10 tơmàn đong dùl nhai.

Hìu măy đèng càl Dăk N’drung bơh lơh mhar ngan nàng pas gơs, tus lơh lơyài wơl ngan nàng gam geh lơh broă

Tàm ală càr tàm tiah Tây Nguyên, Gia Lai geh broă lơh đèng càl dờng ngan rlau jơh, mờ 17 rơndap broă lơh, kờp jơh bơta pràn lơh gơlik pơgap 1 rơbô 200 MW. Mờ ală rơndap broă lơh đèng càl tàm Gia Lai kung gơ ơm tàm bơta nggùl sa nggùl ờ, tŭ geh gĭt nđờ rơhiang nơm jrong tourbin, bơta pràn lơh gơlik rlau 620 MW tàm 10 rơndap broă lơh gơtìp roh giă FIT, gơ ơm tàm bơta “ơm mò dùl anih”, lơh mpồl lơh sa kă bro ơm nggui ờ suk ờ iang tàm ală priă tă ngui bè hơ̆ sùm tàm rơndap rơndồl jat tŭ tơngai mờ priă lơh geh ờ gŏ geh sùm. Kung bè uă cau bơcri priă lơh đèng càl gùt lơgar sơl, bàr pe mpồl lơh sa kă bro đèng càl tàm Gia Lai đơs là, ală bơta lơh tìs jê sồt ngan bơh khi dê là tài bơh uă bơta ờ gơtùi gĭt lài, bè kòp Kovid-19 lơh lơyài tŭ tơngai, ală jơnau sồr kră kơl dang bè dờp ngui kă bro geh gơrềng tus lơh tơrlòng lài măy mok, lơh cau bơcri priă gơ ơm tàm bơta gơ aniai. Mơya, jat ồng Nguyễn Hữu Quế, Kwang atbồ Sở Kế hoạc mờ Đầu tư càr Gia Lai đơs, mpồl lơh sa kă bro đèng càl mìng gơtùi wờl is să tờm he. Tàm tơngai càr hòi jà bơcri priă bồ nam 2020, kòp Kovid-19 neh gơlik geh kal ke ngan. Ală broă lơh bơh Dà lơgar dê geh gơrềng tus đèng càl, kung neh ai ngui bơh lài hơ̆ nàng cau bơcri priă in kơlôi sơnơng mờ sac rơwah. Mờ bơta loh làng ngan rlau jơh là dùl bơta bal, tŭ tơngai, kung gam geh rơndap broă lơh geh lơh sir gờñ, den ală bơta lơyài sơlơ ờ gơtùi tàm tuh tìs ai gơnoar atbồ mờ broă lơh in ờ.

Ồng Nguyễn Hữu Quế đơs: Geh cau bơcri priă khi lơh kràñ cê jơh nùs ngan, mơya geh cau bơcri priă khi gơ kòl wơl hơ̆ là broă tàm dơlam is bơh khi dê, do là broă lơh bal lơm. Geh cau bơcri priă khi mut bơh tơnơ̆, sơnđờm mut lơh tơnơ̆, mơya lơh sir di mờ ngai 31/10, mơya ală cau mờ lơh lơyài, kơn jơ̆ kơn jŭt, pơnyơu bè ờ tơl cau lơh broă halà sră pơrgon  mờ cau bơcri priă mut lơh ờ lơh jat di tơngai den gơtìp lơyài. Hơ̆ là broă bơh cau bơcri priă dê ờ di là Dà lơgar dê ờ.

Broă uă ir rlau mờ nggùl ală rơndap broă lơh ờ geh cồng nha, bulah jơnau gơbàn tờm ngan bơh bơta ờ pràn jak bơh cau bơcri priă dê, mờ geh cồng den geh sa ai gơtìp hoàc huơr den pal kong is là jơnau pal jat bơh drà kă bro dê. Mơya, ờ geh cồng nha bơh ală rơndap broă lơh đèng càl tàm Tây Nguyên dê, lơh rlau nggùl tàm kờp jơh rlau 85 rơbô tơmàn đong priă bơcri gơtìp pơhì pơhà, ờ gŏ di buơn ƀoài mìng là broă bơh kờp dŭ rơndap priă jền kă bro dê ờ. Bơh tŭ ală tiah yal ală sră cih mat ală gah bơcri priă, tus mpồl lơh sa kă bro dan bơcri priă mờ lơh sră nggal... tus tŭ jơh tơngai pơrgon, kờp jơh tơngai mìng geh mờr 2 nam lơm, mờ kòp dờng Kovid-19 neh geh yal lài bơh gờñ ngan. Mơya ală tiah kung gam ur ar hòi jà bơcri priă mờ ală mpồl lơh sa kă bro kung gam ờ rơngòt bơcri priă mờ jơh ală broă, săp sèng jài mờ ntoăt jài. Bơta kơlôi sơnơng lơh tàm pơrlòng, dờp lơh broă do gam gơlam tus uă jơnau gơ lời wơl ndai.

Cau cih Công Bắc- Cau mblàng K’Hạnh