Ồng K’Châu kòn cau K’Ho (ơm tàm thôn 2, xã Lộc Nam, kơnhoàl Bảo Lâm, càr Lâm Đồng) pà gĭt, hìu bơnhă ồng geh măt nàng dờp 25 lồ 5 sào ù brê tàm bơnah 5, tiểu khu 491, mờ mò Ka Phấn ơm dùl thôn bal kung neh cih mat mờ geh mat nàng dờp 16 lồ 5 sào ù tàm tiểu khu 491. Mơya bơta geh ngan jơh bal 2 nă cau do ờ gŏ dờp dùl bơnah ù brê lơi ờ. Ồng K’Châu, đơs:“Brê mpồl bơtiàn den añ geh măt mơya ờ gŏ geh cau jàu dờp ờ. Lài do, tiah wa K’Hân geh đơs là: Sau geh mat tàm broă jàu ù jàu brê. Añ kĭ sră pơr gơn. Mơya ồng đơs là: kĭ ai gơ in di mờ kơrnoat boh lam lơm gơ dê, mê geh tơl gơnoar lơi nàng jàu brê. Jàu ù, jàu brê mờ ờ gŏ gĭt jàu tàm bơnah lơi, tiah lơi kung ờ gŏ gĭt sơl. Ờ gŏ geh jàu mbè lơi nàng gĭt.”

Jăt sră cih mat mpồl bơtiàn mpồl hìu bơnhă dờp brê geh Sở Nông nghiệp mờ Phát triển Nông thôn càr dê kĭ den mpồl lơh tờm là ồng K’Đản, ơm tàm thôn 1 mờ 13 hìu bơnhă tàm ală thôn 2 mờ 4 bơh xã Lộc Nam dê. Mơya ya ờ gĭt bè lơi mờ Ủy ƀan ñân zân kơnhoàl Bảo Lâm den ai wơl kơrnoat jàu brê ai ồng Nguyễn Duy Minh, ơm tàm sồ hìu 29, gùng Tô Hiệu, sơnah ƀòn Lộc Sơn, ƀòn dờng Bảo Lộc lơh kwang bàng ala mat. Mờ ală mpồl bơtiàn bơh ồng Minh dê ala mat do mìng geh 6 hìu bơnhă, ờ gŏ di là 14 hìu bơnhă bè lơh rơndăp broă lơh dê ờ. Kờp jơh bă ù geh jàu là 209 lồ, tàm hơ̆ geh brê là 93 lồ, ù brê bơnơm ờ geh brê là 116 lồ. Jơh ală cau geh jàu ù, jàu brê tàm mpồl do geh tiah ơm kis tàm tiah ndai lơm, ờ gŏ di là làng bol kòn cau dùl ết nă cau dê ờ.

Brê mờ ù brê tàm do hời rơ hời gơ gơs suơn tam tờm chi jŏ nam, geh tŭ geh tăc wơl, kă bro mờ bơ̆t hìu ơm. Jat Sở Nông nghiệp mờ Phát triển Nông thôn càr Lâm Đồng, tus nhai 9 nam 2019, tàm khà 93 lồ brê geh is neh jàu ai mpồl do in atbồ, neh gơtìp roh jơh tơn 73 lồ. Ồng Võ Thiên Bình, Củ tịc Ủy ƀan Ñân zân xã Lộc Nam đơs nền, jơnau tờm brê gơ tìp mus kơl, ù brê bơnơm gơtìp sơgràm phà là tài bơh jàu ờ di cau. Ồng Võ Thiên Bình, đơs:“Broă jàu ù, jàu brê den tơngai pa do tàm ù tiah xã dê geh gơlik geh bàr pe broă lơh tìs. Tŭ do anih lơh broă kảñ sát lùp khàu gam lơh loh broă do. Kwang đơng lam bồ atbồ tàm broă lơh atbồ sền gàr brê bơh mpồl cau tờm brê gam uă bơta ờ hềt loh làng, geh jơnau lơh tìs. Geh dơ̆ broă lơh tìs là jàu ờ di cau”.

Ngai 8/7/2022, ồng Lê Văn Ba, ơm tàm thôn 4, xã Lộc Phú sền gŏ dùl mpồl 3 nă cau là: Nguyễn Đức Dạo, Nguyễn Đức Chung mờ Nguyễn Văn Dũng gam mus kơl brê tàm bơnah 6, tiểu khu 438A. Ồng Ba gơtìp mpồl do lơh pờng, mờ bơta sồt să 12%. Viện Kiểm sát Làng bol kơnhoàl Bảo Lâm neh yă 2 nă cau lơh tìs là Nguyễn Đức Dạo mờ Nguyễn Đức Chung bè tìs “Kơl dang nùs lơh cau ndai sồt să”. Ồng Lê Văn Ba gơ jrañ nùs ngan tài bơh 3 nă cau lơh pờng do, mơya mìng geh 2 nă cau gơtìp yă; broă lơh mus kơl brê nho bơh mpồl cau do dê ờ gŏ geh anih lơh broă geh gơnoar đơs tus. Ồng Lê Văn Ba, đơs:“Sơmờm broă dà lơgar jàu brê mờ neh tăc brê, mus kơl brê, sơgràm khà dơm chi tàm brê uă ngan. Añ neh sền gŏ broă lơh tìs, añ neh yal yă. Den Củ tịc kơnhoàl Bảo Lâm ồng Nguyên Trung Kiên ai tơlik kơrnoăt ai wơl jơh bă ù brê neh jàu ai Mpồl atbồ brê rcang gàr bồ tô dà Dam Bri in atbồ. Mơya tŭ do, ală broă lơh tìs mờ Ủy ƀan Ñân zân càr Lâm Đồng sồr Ủy ƀan Ñân zân kơnhoàl Bảo Lâm ai wơl jơh ală bă ù pa đơs do, tam wơl brê mờ lơh loh ală cau lơh tìs nàng lơh glài jăt jơnau cih. Mơya tus tŭ do broă hơ̆ kung neh huĭ jơh rau”.

Tàm càr Lâm Đồng pa mìng geh 8 mpồl neh geh Ủy ƀan Ñân zân ală kơnhoàl jàu brê mờ kờp jơh bă brê ơnàng là 2 rơbô 260 lồ, tus tŭ do neh ai wơl 5 mpồl. Bơta pal đơs là jơh bal 3 mpồl mờ 99 hìu bơnhă tàm kơnhoàl Bảo Lâm geh jàu mờr 860 lồ ù brê mờ ù brê bơnơm, drờm gơtìp ai wơl lơm. Ồng Võ Danh Tuyên, phó Kwang atbồ Sở Nông nghiệp mờ Phát triển Nông thôn càr Lâm Đồng song dơpă dờp:“Tàm càr Lâm Đồng geh jơnau là jàu brê ờ gŏ di cau. Bơh sơn rờp tŭ sền sơ wì gĭt nền, đơs là di, mơya tơnơ̆ ală hìu bơnhă hơ̆ khi sơmờm broă lơh den hơ̆ sồng khi tăc wơl. Den ù brê bơnơm gơtìp sơgràm, brê gơtìp mus kơl. Tŭ bol añ sền gŏ den sồr ai wơl, mờ neh ai wơl 5 broă lơh mpồl bơtiàn dê. Tàm hơ̆ kung geh kơnòl atbồ bơh kwang bàng brê bơnơm, cau tờm sền gàr brê, Kiểm lâm mờ gơnoar atbồ tiah do dê kung ờ hềt kràñ cê jơh nùs tàm broă do.”

Uă ngan dơ̆ pơrjum, uă jơnau đơs, jơnau dan mờ lơh nền neh geh Sở geh gơrềng mờ Ủy ƀan Ñân zân càr Lâm Đồng ai lơh jat mờ jơnau kờñ: Sồr Ủy ƀan ñân zân ală kơnhoàl ai wơl ală kơrnoat jàu ù jàu brê ai mpồl bơtiàn in. Mơya tàm bơta geh ngan, tàm ală tiah do neh là suơn tam tờm chi jŏ nam, hìu đam kơ̆ kơl jăp. Brê geh jàu dùl bă khat gơboh den gơtìp cau sơgràm jòi sa kwơ dơ̆ dùl ết. Kơnòl do ờ mìng tàm tuh glài ai đah dờp sền gàr brê in lơm ờ. Digơlan mìng ai wơl ală kơrnoăt jàu brê ai mpồl bơtiàn in là bè neh lơh tơl kơnòl broă.