Ală ngai mờr sa tềp, tàm anih lơh rơndap broă lơh gùng rơndeh ntoat mhar Khánh Hoà – Buôn Ma Thuột gơl lòt gan xã Ea Knuếc, kơnhoàl Krông Păk kung gam lơh gùng. Rơndap broă lơh gùng rơndeh ntoat mhar Khánh Hòa – Buôn Ma Thuột jòng mờr 117,5 kơi sồ tơrbŏ càr Khánh Hòa mờ càr Dăk Lăk. Rơndap broă lơh geh tam pà gơs 3 broă lơh dềt, geh: bơnah broă sồ 1 bơh càr Khánh Hòa lơh cau tờm bơcri priă; bơnah broă sồ 2 bơh Ƀộ Giao thông Vận tải lơh; gam wơl bơnah broă sồ 3 bơh càr Dăk Lăk lơh. Bơnah broă do geh càr Dăk Lăk jàu ai Mpồl atbồ Rơndap broă lơh bơcri priă lơh broă lơh gùng lòt mờ lơh sa suơn sre bơtàu tơnguh ƀòn lơgar càr lơh cau tờm bơcri priă lam lơh.

Tàm dơ̆ sa tềp nam Giáp Thìn 2024 do, ală mpồl lơh broă gơ wèt bơnah broă sồ 3 ndrờm cih mat lơh broă jơh gùt ală ngai sa tềp, mpồl atbồ neh sồr ală cau tờm mpồl lơh sa kă bro bơdìh mờ gàr niam tơngai hơ pơrgon, bơta niam lam lơh broă lơh den pal sền gròi wil tơl tus broă dong kờl ai cau lơh broă tus bal lơh rơndap broă lơh in jat jơnau sồr.