VOV4.K’ho- Sa tềp trung thu là tŭ nàng kơnòm dềt in nhơl ñŏ, rò đèng gŭ, sền tam ya đăng grài. Bulah bè hơ̆, gơwèt mờ kơnòm dềt tàm tiah sar lơgar ngài, tiah làng bol jơi bơtiàn kòn cau dùl êt nă cau den ƀañ trung thu halà đèng gŭ là ală phan kas màng ngan. Ală ngai do, uă mpồl cau, mpồl lơh broă neh hòi jà uă bơta tă pơgồp nàng cèng tus kơnòm dềt jơi bơtiàn kòn cau dùl êt nă cau in dùl ngai sa tềp trung thu ngan ngồn geh kuơ. Tàm xã Pa Ủ, kơnhoàl Mường Tè, càr Lai Châu, ală y, ƀák sĩ hìu sơnơm Quân y 354 (Tổng kụk hậu kần), Ủy ƀan khà kờp làng bol hìu bơnhă mờ kơnòm dềt Ƀộ Quôk phòng bơyai lơh kham kòp, pơlam, pà sơnơm ờ sa priă ai 367 nă sau là ală kơnòm bơsram Hìu bơsram kâp 3 kòn cau ơm sa ngai kâp 2 Pa Ủ. Tàm tơngume broă lơh “Trung thu ai oh in nam 2022”, mờr 700 nă oh dềt bơh xã Pa Ủ dê gam geh sa ƀañ Trung thu, rò bi Hằng, wa Cuội mờ dờp uă bơnah phan pà geh kuơ ngan bơh Mpồl bơyai lơh mờ ală cau geh nùs nhơm niam jàu pà. Kờp jơh phan pà mờ priă dong kờl bơsram mờr 4 tơmàn 500 tơlak đông.

Bơyai lơh sa tềp trung thu tàm tiah nhàr dà lơgar kơnhoàl A Lưới, càr Thừa Thiên - Huế

Tàm tiah nhàr dà lơgar càr Thừa Thiên - Huế, git nđờ rhiang nă kơnòm bơsram kâp 1, kâp 2 Hồng Thuỷ, xã tiah nhàr dà lơgar bơh kơnhoàl A Lưới dê geh chờ hờp wă rò trung thu ram mhŭ. Ală broă lơh bơh ală mpồl bal, cau dùl nă să geh nùs nhơm niam dê lời ai ală oh dềt tiah kal ke, tiah jơi bơtiàn kòn cau dùl êt nă cau, tiah nhàr dà lơgar in neh ai tơnggŏ bơhiàn “Kờñ cau bè kờñ să tờm” bơh jơi bơtiàn he dê.

Cau mblàng K’Duẩn