VOV4.K’ho - Tàm ală nam do Satềp tam chi rài rài kah ưn ngài Bác Hồ sùm geh càr Kon Tum bơyai lơh mờ dờp geh broă kờñ bal bơh ală làng bol tàm càr do dê. Nam do dơ̆ lam sồr satềp tam chi rài rài kah ưn ngài Bác Hồ geh UɃÑZ càr bơyai lơh di ngai tiah kis dunia ngai 05 nhai 6 tàm thị trấn Đăk Tô, kơnhoàl Đăk Tô. Tàm dơ̆ lam sồr, UɃÑZ càr Kon Tum kung mùl màl lơh jăt broă tam pa 4 rơbô 500 lồ brê tàm kàl mìu nam do.

Nam do, di nhai 6 pa do, tàm thị trấn Đăk Tô, kơnhoàl Đăk Tô, UɃÑZ càr Kon Tum bơyai lơh dơ̆ lam sồr Satềp tam chi rài rài kah ưn ngài Bác Hồ nam 2022 mờ dờp bal ngai tiah kis dunia. Tơnơ̆ mờ dơ̆ lam sồr, kwang đơng lam càr Kon Tum, kwang bàng ală sở, gah lơh broă, mpồl lơh broă bal mờ gal làng bol kis tàm kơnhoàl Đăk Tô neh lik tam git nđờ rơhiang tờm chi tàm ƀlàng dờng ngai 24 nhai 4 mờ ờ uă tiah tàm thị trấn Đăk Tô. Ồng Đặng Hoàng Nam, Củ tịc UɃÑZ kơnhoàl Đăk Tô pà git, tàm ală nam pa do, gơunoar atbồ kơnhoàl geh sền gròi ngan tus mờ broă tam tờm chi nàng geh brê, nàng ai geh bơta niam ù tiah mờ sền gàr tiah kis: “Lơh jăt jơnau kờñ bè broă tam brê lơh gơtìm tơlir ù tiah ờ hòn chi tàm kơnhoàl Đăk Tô kung neh tam geh rơlao 500 lồ mờ rơlao 50 rơbô tờm chi ờ tơrgùm bal. tơngai tus nàng lơh jăt niam Nghị quyết sồ 16 Đảng ƀộ càr bal mờ Nghị quyết sồ 17 bơh Pơrjum dờng Đảng ƀộ kơnhoàl dê, kơnhoàl geh pơn jăt tai tam tus nam 2025 là pal geh rơlao 1 rơbô lồ brê mờ rơlao 50% khà gơtìm chi brê tàm kơnhoàl Đăk Tô. Do là dùl kơnòl bơh Đảng ƀộ, gơnoar atbồ bal mờ làng bol kis tàm kơnhoàl Đăk Tô dê pal lơh ngan lơh niam mờ geh jăt jơnau neh geh ai”.

Mùl màl pà gŏ, tàm ală nam pa do broă tam chi rài rài kah ưn ngài Bác Hồ mờ dờp bal ngai tiah kis dunia sùm geh ală kấp, ală gah lơh broă bal mờ làng bol kis tàm càr Kon Tum dờp bal, tus bal tam. Broă ai lài priă tus mờ broă tam chi brê kung geh sền gròi ngan sơl. Mìng is tàm dơ̆ lam sồr satềp tam chi rài rài kah ưn ngài Bác Hồ mờ dờp bal Ngai tiah kis dunia ngai 05 nhai 06, Kes priă Sền gàr mờ tơnguh bơtàu brê càr Kon Tum neh jào priă ai Sở Nông nghiệp mờ Phát triển Nông thôn càr blơi, pà ai rơlao 157 rơbô 700 tờm chi, tàm hơư geh ală bơta chi bè: pơngir jù, kơl te, giáng hương, nho 3 nha... ai ală mpồl, ală tiah in tam. Ồng Hồ Thanh Hoàng, Kwang atbồ Kes priă Sền gàr mờ tơnguh bơtàu brê càr Kon Tum pà git: “Bol añ kung neh ai priă tă bơh ală hìu lơh dà kloh mờ ală hìu lơh sa mờ măi mŏk geh ngui dà bơh dà tàm tiah do dê mờ khà là 650 tơlăk đong dan mờ UɃÑZ càr tam pà ai Sở Nông nghiệp mờ Phát triển Nông thôn in blơi sơntìl tòm chi. Mờ broă ring bal bơh mpồl lơh broă cíñ trị, geh gal làng bol dùl nùs bal kờñ, càr Kon Tum tam geh cồng nha”.

Tàm kàl mìu nam do, càr Kon Tum ai jơnau kờñ tam pa 4 rơbô 500 lồ brê. Tơnơ̆ mờ tŭ UɃÑZ càr jào khà, 10 kơnhoàl, ƀòn dờng tàm càr mờ ală mpồl cau tờm brê neh lơh rơndăp broă nàng lơh jăt kơnòl. Geh ờ uă tiah dan tam brê uă rơlao mờ jơnau sồr geh ai, bè kơnhoàl Đăk Hà gam tam pa 450 lồ, sơrlèt 152 lồ pơn drờm mờ rơndăp broă geh jào; Ƀòn dờng Kon Tum dan tam pa 500 lồ, sơrlèt 302 lồ pơn drờm mờ rơndăp broă geh jào... Ồng Võ Sỹ Chung, kwang atbồ Ci Kụk sền gàr brê càr Kon Tum pà git, bal mờ broă tus bal bơto sồr tàm broă tam, rơwah tòm chi sơntìl di pal nàng tam, mpồl lơh broă kung chồl pràn broă atbồ nàng sền gàr niam bă ù brê tŭ do neh geh kung bè bă brê tam pa: “Tàm càr tŭ do bol añ gam pơn jăt tai lik lơh broă nàng bal mờ ală kấp, ală gah lơh broă tàm ală kơnhoàl, ƀòn dờng lơh niam broă atbồ, sền gàr brê. Geh gùng dà atbồ, sền gàr niam bă brê tŭ do mờ geh tơnguh bơtàu tam brê uă rơlao tai”.

Gùt càr Kon Tum tŭ do geh rơlao 780 rơbô lồ brê mờ ù brê geh mờr 80% bă ù geh is tàm gùt càr dê. Tàm nam 2021 lài do, ală tiah bal mờ mpồl cau tờm brê tàm càr neh tam pa geh rơlao 4 rơbô 800 lồ brê mờ rơlao 701 rơbô tờm chi tam, tam cah is sơrlèt mờ rơndăp broă neh geh ai. Bơta kwơ dờng màng mờ brê geh cèng wơl ai rài kis in, tàm hơ̆ geh cồng nha bơh broă lơh jăt broă tơm priă sền gàr tiah kis brê gam pơn jăt tai ai geh bơta pràn tàm broă tam brê mờ sền gàr brê tàm càr Kon Tum dê.

Cau cih Khoa Điềm-Cau mblàng Ndong Brawl