VOV4.K’ho- Ală ngai lồi nhai 4 pa do tàm Trường Sa gơ lơh krơi is ngan tài bơh tàm tiah do 47 nam rê wơl hờ lài, ngai 29/04/1975, mpồl ling bơh Đội sồ 1 đặc kông ling dà lềng bal mờ dùl mpồl ling đặc kông Quân khu 5 mìng tàm tơngai lyah ngan neh mut sò tơm sơr băc mhar, lơh sir jak ngan kơnòl broă geh kwơ jŏ jòng dờng màng ngan- tơngklàs bồt Trường Sa, pơgồp bơnah tàm bơta tam lơh pha lin wil tơl, dờng màng bơh jơi bơtiàn he dê. 47 nam lòt gan, ling klàng làng bol Trường Sa sơm bat tê bal dùl nùs bal, bal mờ gơ̆p bơt bơtàu kơnhoàl bồt ngai sơlơ pas niam, ală rơnàng kwang bàng ling dà lềng tàm ala bal mờ gơ̆p sền gàr gơnoar tờm bồt dà lềng bơh Dà lơgar dê tàm tiah nhàr dà lềng.

Tàm bơta ơning ơnàng nsừc dà lềng, bơh bùng bi pơr hê sơmañ rơmĭt gơ par tềng jrong sơntơ̆p gơnoar tờm tàm bồt Song Tử Tây dê, iăt kơno ling klàng làng bol đơs crih jơnau đơs quốk ka gơ lơh ngoh rơngăc bơta pin dờn pơn iờ să ngan bơh ală cau kòn Việt Nam dê. 10 jơnau sơn tơm să bơh ling klàng làng bol tàm mpồl ling klàng làng bol Việt Nam dê geh cau ling bồt Song Tử Tây sền dờng ngan, mpong ntas tơngŏ nùs nhơm lơh ngan sơr lèt gan tơl bơta lòng tiah dà lềng, sền gàr gơnoar tờm bồt dà lềng bơh Dà lơgar dê.

Song Tử Tây là bồt bơh chờm geh tơngklàs tàm ală ngai nhai 4 nam 1975 kah yau. Lơh jat niam bơhiàn bơh mpồl ling dà lềng dê, ală nam do, ling klàng làng bol tàm bồt Song Tử Tây sùm tam klăc bal, đềt mềr, bal mờ gơ̆p bơt bơtàu, sền gàr bồt. Trung tá Phạm Quốc Hùng, Cíñ trị viên cụm tam lơh 2 bồt Song Tử Tây pà gĭt: Añ sùm sền gĭt nền bulah tàm khat dùl bơta lơi kung ai jơh bơta pràn nàng drơng broă dà lơgar mờ làng bol in, sền gàr kơ̆ kơljap tiah dà lềng ring lơngai mờ bơtàu tơnguh....

Ơm gak tàm bồt Song Tử Tây

47 nam neh lòt gan, ală rơnàng kwang bàng, cau ling dà lềng tàm pơn jat bal sùm bal mờ gơ̆p nàng sền gàr gơnoar tờm bồt dà lềng tàm Trường Sa sùm cih kah tơngai tam lơh pha lin sơr băc mhar tơngklàs Trường Sa bơh ală rơnàng bèp bi lòt lài neh ờ pơlai mhàm ntìng he dê nàng sền gàr gơnoar tờm bồt dà lềng bơh Dà lơgar dê. Hơ̆ ờ mìng tơngŏ nùs nhơm tơm lơh pràn kơl dang jơh nùs, khin cha jak chài lơm gời mờ gam là bơta kơ̆p kờñ ring lơngai bơh mpồl ling dà lềng Việt Nam dê tàm broă lơh sền gàr gơnoar tờm dà lơgar tàm dà lềng. Trung tá Ngô Văn Hưng, Kwang atbồ bồt Trường Sa đơs nền:  Kơnòl broă rcang lài tam lơh là kơnòl broă cíñ trị tờm ngan, sùm sùm bơh mpồl ling dê. Mpồl ling neh sồr lơh ngan lơh nền ai kwang bàng, cau ling tơnguh uă nùs nhơm rcang sền ngăc, rcang lài tam lơh uă, bơt bơtàu broă rơndap lơh gàr niam sùm mpồl ling mờ rơndeh rơndồ măy mok pơlam tàp, bơsong jak ngan ală broă lơh, gàr niam ală broă lơh sùm sùm rcang lài, kòn bơnus rcang lài, phàu crong rcang lài tŭ geh kơrnoat sồr tam lơh là gơtùi lơh jat kơnòl broă tam lơh jai pha, pơgồp bơnah sền gàr kơ̆ kơljap gơnoar tờm bồt dà lềng bơh dà lơgar dê.

Yŭ rơyùm dơ̆ yồng bùng bi tàm bồt Trường Sa

Trường Sa- tiah nhàr dà lơgar tàm dà lềng bơh dà lơgar dê, ờ mìng geh kwang bàng, cau ling ngai mang ơm gak, sền gàr bồt dà lềng lơm, mờ tàm hơ̆  kung geh ală hìu bơnhă bềng lìu bơta chờ hờp mờ kờñ gơboh. Gơwèt mờ tơl nă làng bol, khi pơñ iờ să ngan tài bơh ngai mang pơgồp bơnah sền gàr bồt dà lềng dờng màng bơh dà lơgar dê. Bi Nguyễn Thị Mỹ Dung, làng bol kis tàm bồt Trường Sa yal: tiah bơh sơn rờp dà lơgar, rài kis bè ờs mờ bềng lìu nùs nhơm ling klàng làng bol neh bơnah lơi dong làng bol bơsong bơta kal ke, ling klàng làng bol dùl nùs bal, sơm bat tê bal, dùl nùs bal nàng bơt bơtàu tiah sền gàr lơngap lơngai làng bol kơ̆ kơljap. Bi Nguyễn Thị Mỹ Dung, đơs: Kơnờm bơta sền gròi bơh Đảng, Dà lơgar, Quân chủng ling dà lềng, nùs nhơm jơh gùt lơgar wèt rê mờ Trường Sa, rài kis tàm bồt tam gơl pa uă ngan bè bơta niam chài rơgơi, nùs nhơm, muh mat ƀòn lơgar, tiah ơm kis, rài kis niam rlau, ală oh kòn geh lòt bơsram tàm hìu bơsram. Bulah trồ tiah ro kơnrañ, kal ke mơya ling klàng làng bol tàm bồt dùl nùs bal, tam klăc bal sơr lèt gan  kal ke, bơta lòng, tam dră mờ bơta lòng, bơt bơtàu Trường Sa ngai sơlơ pas niam rlau tai.

Bơh dùl nơm bồt geh uă tơngai càl, ờ tơl dà ngui sa den tŭ do, geh bơta sền gròi bơh Đảng, Dà lơgar, Ling klàng mờ làng bol gùt lơgar dê, Trường Sa neh tam gơl uă ngan, ngai sơlơ pa, tơl làm rlau, dờng niam rlau. Jơh ală broă lơh phan bơna tàm bồt  geh lơh jak ngan, gùng lòt, gùng rê ndrờm lơh be tông jơh lơm, kloh niam ngan. Tàm blàng bràs kò mờ san hô neh geh glòm dà tơlir niam ngan bơh ală ñhâm tờm bàng vuông, phong ba, tờm lơ u, tờm nhàu, tờm bơl hông... Bơtàu tơnguh mờ tam uă biăp, đèng ngui tàm rài kis, sóng điện thoại at tê neh dŭi rềp đah Trường Sa mờ ù gờl. Ồng Lương Xuân Giáp, Củ tịc Hội đồng Ñân zân kơnhoàl Trường Sa pà gĭt: bulah gam uă kal ke mơya tơl nă kwang bàng, cau ling mờ làng bol kơnhoàl bồt dê ndrờm gĭt wă loh ngan kơnòl bơh he dê. Ồng Lương Xuân Giáp đơs: Bulah tàm khat dùl bơta lơi ling klàng làng bol Trường Sa kung dùl nùs ngan mờ Đảng, Dà lơgar, làng bol mờ Xã hội Củ nghĩa, tam klăc bal, mìng dùl nùs lơm, lơh ngan bơsong kal ke, lơh sir jak ngan tơl kơnòl broă geh jàu, là tiah kơldìng ai làng bol kŭp ka in lòt kŭp ka tàm dà lềng, sùm rcang ngăc, rcang lài tam lơh chơ̆t phi să nàng sền gàr kơ̆p kơljap gơnoar tờm bồt dà lềng bơh Dà lơgar dê.

Neh sơr lèt gan gĭt nđờ kàl mìu, kàl trồ tơngai, sơr lèt gan bơta kal ke bơh trồ tiah dê, Trường Sa kung gam ơm kơ̆ tàm tiah dà lềng bè dùl tềl tơngŏ bè nùs nhơm kơ̆ dơn, dòn song mờ bơta pràn kơl dang ngan bơh ling klàng mờ làng bol Trường Sa tàm gùl dà lềng bềng càl rơbŭt dờng dê. Sơr lèt gan gĭt nđờ bơta kal ke, bòl glar, ling klàng mờ làng bol kơnhoàl bồt Trường Sơn kung gam kơ̆ kơljap pah ngai ai jơnau kờñ bơt bơtàu kơnhoàl bồt pas pràn in.

Cau mblàng K’Hạnh