VOV4.K’ho- Brê dà lơgar Yok Đôn geh bă ù ơnàng rlau 115 rbô lồ, gơ ơm dă jòng mờ dờng ơning ơnàng tàm bàr càr Dăk Lăk mờ Dăk Nông mờ rềp nhàr bal mờ càr Mundulkiri, lơgar Campuchia dê. Tàm do, uă ngan là ală chi che phan kis brê chi nha dờng gơjrùh nha tàm kàl prang gam hòi là brê ờ huan geh nha. Do là Brê dà lơgar mìng dùl lơm tàm lơgar he gam prăp gàr geh bơta brê dờng màng do. Nàng sền gàr ờdo ờdă ai ală bă brê ờ huan geh nha ƀươn gơbàn ồs sa tàm kàl prang, Brê dà lơgar Yok Đôn mờ mpồl lơh broă tàm tiah do neh mờ gam lam lơh dùl ròt uă broă lơh rơcăng sơndră ồs sa brê.

Trồ tiah Tây Nguyên gam mŭt tàm kàl prang dờng. Tềng hơđơm mƀur chi dờng tàm Brê dà lơgar Yok Đôn, ñhơ̆t chi che bal mờ uă cờñ nha gơjrùh tàm ală ƀlàng ñhơ̆t ja, ñhơ̆t hòn lềng, mpung sơkàr...neh ro jơh nha. Ồng Nguyễn Hữu Tạo, Phó Kwang ătbồ Hạt Kiểm lâm Brê dà lơgar Yok Đôn yal, tơngai do, ƀlàng ñhơ̆t chi che ƀươn ngan gơtìp ồs sa. Bơh bồ kàl prang tơn, mpồl neh jơh nùs lam lơh broă lơh rơcăng sơndră ồs sa brê. Bal mờ broă lơh gĭt nđờ rbô gùng cang kơryan ồs, tàp lơh ală broă lơh rơcăng sơndră ồs sa brê, mpồl neh căng tiah, bơsong chu ñhơ̆t chi che hòn lềng bơh gờñ. Ồng Nguyễn Hữu Tạo yal: Tàm brê tŭ do gam geh 17 trạm, mpồl mờ bol añ gam sồr lơh broă drơng găk sùm ngai bè mang, lơh bè lơi lam lòt tus jơh ală bă brê tàm brê, lơh jăt broă lơh chu ñhơ̆t pa hòn geh gròi sền, bơsong phan ồs sa. Lơh bè lơi broă chu ñhơ̆t chi che hòn lềng ồs gơ sa tàm bă dềt, ờ gŏ lơh gơrềng tus tờm chi brê, sền gàr ai brê in kis dờng niam.

Pơgồp bal mờ cau tờm brê, ală hìu dờp ătbồ mờ sền gàr brê lơh rlau 120 kơi sồ gùng căng kơryan ồs      

Tàm tiah dơlam Brê dà lơgar Yok Đôn dê tŭ do geh mờr 30 rbô hìu bơnhă làng bol ơm kis tàm 7 xã bơh ală kơnhoàl: Buôn Đôn, Ea Súp, càr Dăk Lăk, mờ kơnhoàl Cư Jŭt, càr Dăk Nông dê. Jơh ală làng bol là kòn cau dùl êt nă cau, rài kis gam kơnờm uă tàm brê. Mò H’Khưa Hđơt, cau Rơđê, ơm tàm ƀòn Jang Lành, xã Krông Na, kơnhoàl Buôn Đôn, càr Dăk Lăk pà gĭt, hìu bơnhă mò bal mờ 19 hìu bơnhă ndai dờp sền gàr 500 lồ brê geh is gơwèt Brê dà lơgar Yok Đôn. Tàm kàl prang, làng bol neh tam pà gơs 5 mpồl tàm ala gơ̆p lòt sền brê pơgồp bal mờ lam lơh jăt ală broă lơh rơcăng sơndră ồs sa brê. Mò H’Khưa Hđơt, yal: Bơh ngai ală kwang bàng sền gàr brê jàu ai broă ătbồ brê, làng bol kung lòt tơnơ̆ khi, kung lơh niam sơl, ờ lời gơbàn ồs sa, ală cau dờp ătbồ, sền gàr brê kung lòt jăt tơnơ̆ ală kwang bàng lơh broă lơh sền gàr brê, ờ lời gơbàn jơnau ồs sa brê. Bơh ngai ală kwang bàng sền gàr brê rê mờ ƀòn lơgar den bơto pơlam ai làng bol tàm ƀòn lơgar in bañ lơh mìr, lơh sươn, sơgràm ù brê, bơh hơ̆ den làng bol kung gĭt ătbồ mờ sền gàr brê.

Brê dà lơgar Yok Đôn là dùl tàm ală bă brê ngui kwơmàng gơwèt bă brê dờng ngan rlau jơh gùt lơgar bal mờ rlau 115 rbô lồ, gơ ơm dă jòng dờng ơning ơnàng tàm ù tiah bàr càr Dăk Lăk, Dăk Nông, ơm rềp nhàr bal mờ càr Mundulkiri, lơgar Campuchia. Tàm do, geh rlau 220 bơta chi che tàm hơ̆ geh uă dơm chi kwơ ngan; pơgăp 340 jơi phan kis, pơnrơ ngan là rwas, krih, gơbai, kơnrồ brê, pì par....

Mpồl lơh broă geh gơnoar bơh Brê dà lơgar Yok Đôn dê căng tiah, chu tơdao ñhơ̆t chi che hòn lềng tàm brê

Ồng Phạm Tuấn Linh, Kwang ătbồ Brê dà lơgar Yok Đôn yal, bơta pơgồp bal dùl ròt bal đah ală mpồl sền gàr brê, gơnoar ătbồ tiah do mờ ală hìu dờp ătbồ sền gàr brê neh lơh jăt niam broă lơh ătbồ sền gàr brê. Tàm uă nam rê wơl hờ ndo, Brê dà lơgar Yok Đôn ờ lời gơlik geh jơnau ồs sa brê lơi dờng. Kàl prang do, Brê dà lơgar Yok Đôn pơgồp bal mờ ală mpồl lơh broă geh gơrềng lam lơh jăt kràñ cê jơh nùs ngan ală gùng dà broă lơh rơcăng sơndră ồs sa brê, pès khòm tơrgùm jơh ñhơ̆t chi che hòn lềng rlau 120 kơi sồ gùng cang kơryan ồs, lơh gĭt nđờ rhiang nơm kƀàng yal tơngkah lài, crơng gơs 17 mpồl lam lài lơh jăt kơnòl broă jăt sền, drơng gak, mblàng yal, hòi jà làng bol sền gàr bal brê. Ồng Phạm Tuấn Linh đơs: Kờñ sền gàr brê halà rơcăng sơndră ồs sa brê den bol añ gĭt nền broă lơh rơcăng lài là tờm. Brê dà lơgar neh bơyai lơh mblàng yal ai rlau 4 rbô nă làng bol in tus bal mờ 5 hìu bơsram in nàng làng bol mờ kơnòm bơsram gĭt geh bơta kwơmàng bơh brê, tiah ơm kis brê dê. Pơgồp bal mờ Ủy ƀan Ñân zân 7 xã tàm tiah dơlam brê lơh jăt kơrnoăt pơgồp bal lam lòt sền, sền gàr brê, kơryan mờ bơsong di tŭ ală broă lơh tìs gơ aniai tus brê. Bal mờ hơ̆ là sồr 17 trạm, mpồl tàm tiah lơh broă jơh nùs lòt sền, kơryan ală cau halà làng bol sùm lik mŭt tàm brê cèng bal ồs digơlan lơh gơbàn ồs sa.

            Cau cih Nguyễn Tuấn Long- Cau mblàng Lơ Mu K’Yến