Tềng tiah lơh broă crăp phan sồ 03 gơwèt rơndăp broă bơnah broă 03 gùng rơndeh ntoăt mhar Khánh Hoà – Buôn Ma Thuột, Tổng Kông ty bơ̆t bơtàu sồ 01 neh hòi jà rơlao 60 nă cau chài, cau lơh broă bal mờ 60 nơm rơndeh ală bơta nàng lơh mhar broă lơh neh geh ai.

Bi Nguyễn Đình Lợi, kwang bàng gah bơta chài lơh broă tàm do pà git: “Lơh jăt jơnau sồr bơh Thủ tướng dê là mìng cri bơyai nàng lơh ờ gơtùi cri bơyai wơl tai, ờ ngòt mờ trồ tơngai ha là trồ mìu nàng lơh ngai kung bè mang den neh lơh geh uă tàm jơh ală tiah tàm gùng rơndeh ntoăt mhar Khánh Hoà – Buôn Ma Thuột, den tàng ală oh mi kwang bàng, cau chài, cau lơh broă, cau măi rơndeh, cau măi phan lơh broă lơh ngan lơh jăt jơnau sồr bơh Thủ tướng dê. Ală bơta kal ke tàm tiah lơh broă bè trồ tiah den tàm nùs nhơm lơh ngan uă geh ai tơngŏ tàm bơta “trồ mìu di mơ den sền bè ờ mìu, di lah trồ mìu sơr den bè mìu di mơ mờ di lah gam trồ mìu sơr ngan den tìm toal tăng nàng lơh broă”.

Dờp lơh ală bơnah broă 16,5 kơi sồ lơh tàm càr Dăk Lăk mờ 22 kơi sồ gơwèt càr Khánh Hoà, ồng Nguyễn Viết Hải, Củ tịc mpồl duh broă Tập đoàn Sơn Hải pà git, tập đoàn neh tơrgùm jơh ală cau, mang mờ ngai lơh sùm, lơh ngan lơh gơs broă rơndăp lơh neh geh ai. Ồng Nguyễn Viết Hải pà git: “Bol añ hơ Rơndăp broă lơh Nha Trang – Buôn Ma Thuột bơnah broă sồ 03 rơ̆p lơh gơs tàm nam 2025, hơ̆ là lài dùl nam pơn drờm mờ broă rơndăp lơh neh ring bal là tàm nam 2026. Mờ Rơndăp broă Nha Trang – Buôn Ma Thuột bơnah broă sồ 01 lòt gan càr Khánh Hoà jòng 22 kơi sồ tơrbŏ bơh gùng sồ 01 tus gùng sồ 26 bol añ kung hơ tơmù tơngai lơh gơs tàm nam 2025 sơl”.

Rơndăp broă lơh gùng rơndeh ntoăt mhar Buôn Ma Thuột – Khánh Hoà jòng 117,5 kơi sồ, tàm hơ̆ geh 03 rơndăp broă lơh jăt bơnah broă, geh mŭt lơh bơh nhai 06 nam 2023, kờp dŭ geh lơh gơs tàm nam 2026. Tus tŭ do, rơndăp broă lơh gơnah broă sồ 01 geh Anih duh broă Làng bol càr Khánh Hoà lơh tờm bơcri priă geh khà priă lơh 20%; Rơndăp broă bơnah broă sồ 02 geh Ƀộ Gùng lòt Pơn diang phan lơh tờm bơcri priă kờp jơh khà priă lơh broă geh mờr 7%; Rơndăp broă bơnah broă sồ 03 geh Anih duh broă Làng bol càr Dăk Lăk lơh tờm bơcri priă geh rơlao 15% khà priă. Ồng Phạm Ngọc Nghị, Củ tịc Anih duh broă Làng bol càr Dăk Lăk pà git, Rơndăp broă lơh di pal mờ jơnau geh ai lơh jăt Jơnau lơh nền sồ 89 ngai 25 nhai 07 nam 2022 bơh Cíñ phủ dê.

Ồng Phạm Ngọc Nghị pà git: “Dờp bal Dơ̆ pơrlòng lik lơh broă geh Thủ tướng Cíñ phủ lam lơh, càr Dăk Lăk dan hơ, pơn jăt tai lơh pràn rơlao tàm broă jăt sền, lam lơh, ai tơl bơta ƀuơn ngan nàng ală mpồl lơh broă in, pơlam lơh gơs rơndăp broă. Añ pin dờn là, mờ broă lam sồr pràn bơh Thủ tướng Cíñ phủ dê; broă dong kờl pràn bơh ală Gah, Ƀộ lơh broă Dà lơgar; broă lơh ngan bơh ală anih lơh broă, mpồl lơh broă, ală tiah gơrềng bal, bal mờ broă dùl nùs, dùl pràn kờñ bal bơh làng bol ală jơi bơtiàn tàm càr dê tai, di gơlan Rơndăp broă bơnah broă sồ 03 rơ̆p lơh gơs tàm nam 2025 mờ jơh Rơndăp broă bơcri priă lơh gùng rơndeh ntoăt mhar Khánh Hoà – Buôn Ma Thuột tơngai sơnrờp rơ̆p lơh gơs di mờ broă rơndăp lơh neh geh ai”.

Mờ broă sền gròi, sồr lơh bơh Dà lơgar dê tus mờ càr, broă rơcang lài, lơh ngan, lơh pràn bơh cau tờm bơcri priă dê bal mờ ală cau lơh, kơ̆p kờñ Rơndăp broă lơh gùng rơndeh ntoăt mhar Khánh Hoà – Buôn Ma Thuột rơp geh mờ sơrlèt mờ broă rơndăp lơh neh geh ai, di pal mờ jơnau kơ̆p kờñ, kơ̆p gơn bơh làng bol dê.