VOV4.K’ho- Mho ngai 23/9, tàm Hà Nội, Ƀộ Thông tin mờ Truyền thông pơgồp bal mờ Anih jơnau đơs Việt Nam, Anih sơñio rùp Việt Nam bơyai lơh pơrjum “Sơlơ bơtàu tơnguh bơnàng jă pờ tơlik jơnau đơs sồ, bơnàng jă anih sơñio rùp sồ dà lơgar” bơh Ƀộ Thông tin mờ Truyền thông pơgồp bal mờ Anih jơnau đơs Việt Nam, Anih sơñio rùp Việt Nam. Gùt lơgar tŭ do geh 72 anih lơh broă pờ tơlik jơnau đơs sơñio rùp gơ wèt ală anih pờ tơlik jơnau đơs sơñio rùp. Jat ală kwang bàng đơs, pờ tơlik jơnau đơs mờ sơñio rùp là bơta tơrgùm pơgồp bal đah tơngume mờ bơta chài.

Tàm tơngai kông nghệ sồ, tam gơl sồ bè tŭ do den bơta bơtàu tơnguh pa bè kông nghệ geh gơ rềng tus tơl gah lơh sa- mpồl bơtiàn, tàm hơ̆ geh gah sră ƀău, pờ tơlik jơnau đơs, sơñio rùp. Kông nghệ sồ geh tam gơl ală anih pờ tơlik jơnau đơs sơñio rùp mờ dong ală anih pờ tơlik jơnau đơs sơñio rùp lam lơh kơnòl broă kuơmàng he dê niam rlau dilah di tŭ tam gơl pràn kơldang mờ git loh tŭ niam. Bơnàng jă pờ tơlik jơnau đơs sồ dà lơgar dong làng bol gơtùi iat,  iat wơl ală gah pờ tơlik jơnau đơs tàm Việt Nam tơl tŭ, tơl tiah, kờp bal gơ wèt mờ cau iat là cau lơgar Việt Nam tàm lơgar ndai. Anih jơnau đơs Việt Nam gam bơt bơtàu Rơndap broă lơh bơnàng jă sồ pờ tơlik jơnau đơs dà lơgar mờ kờp dŭ bồ quý 3 nam 2023 geh ngan ngồn ai lơh broă.

Cau mblàng K’Duẩn