VOV4.K’ho- Tơnơ̆ uă ngai lòt sền, lùp nàng gĭt bè tiah klŏ tơrluh ù tàm kơnhoàl Kon Plông, càr Kon Tum, poh lài, tàm thị trấn Măng Đen, kơnhoàl Kon Plông, Mpồl lơh broă bơh Mpồl đơng lam Dà lơgar bè rơcăng sơndră trồ tiah lơh aniai neh geh dơ̆ lơh broă mờ Mpồl đơng lam rơcăng sơndră trồ tiah lơh aniai mờ Lòt jòi dong kờl rềs àr càr Kon Tum. Sơlơ pơgồp bal, rơcăng lài sơndră wơl mờ tơrluh ù nàng gàr niam ờdo ờdă màng kis, jơtài bơh làng bol dê mờ ală broă bơ̆t bơtàu là ală broă geh sền gròi ngan.

Jơnau yal bơh kơnhoàl Kon Plông dê, bơh Mpồl đơng lam Rơcăng sơndră trồ tiah lơh aniai mờ Lòt jòi dong kờl rềs àr càr Kon Tum dê mờ Mpồl lơh broă pà gŏ, bulah ờ hềt gơbàn hoàc hươr bè kòn bơnus kung bè jơtài, mơya ală dơ̆ tơrluh ù, rơngô ù tàm tơngai pa do neh lơh làng bol kơlôi rơcăng mờ rơngòt ngan. Broă lơh mblàng yal rơpoa nùs làng bol, pơlam làng bol rơcăng sơndră jơnau gơlời wơl gơlik geh dơ̆ tơrluh ù neh geh gơnoar ătbồ kơnhoàl Kon Plông lam lơh broă sơnrờp, mơya cồng nha ờ hềt di bè bơta kơ̆p kờñ. Tềng đăp bơta geh ngan tơrluh ù là bơta trồ tiah lơh aniai pa, ală anih lơh broă càr dê ờ geh tơl pràn jak tàm broă lơh do, ồng Văn Tất Cường, Phó Kwang ătbồ Sở Nông nghiệp mờ Phát triển Nông thôn càr Kon Tum, Kwang bàng duh broă sùm tàm Mpồl đơng lam Rơcăng sơndră trồ tiah lơh aniai mờ Lòt jòi dong kờl rềs àr càr Kon Tum dê, dan: Añ dan mờ ală Ƀộ, ngàñ geh gơrềng mŭt lơh tơn tàm broă lơh kơlôi sơnơng, sền swì bơta tơrluh ù tàm tơngai pa do tàm ù tiah càr Kon Tum, ngan là bơh kơnhoàl Kon Plông dê. Mhar geh ală jơnau yal dùl êt jơh ală jơnau bơh tài gơbàn, bơh hơ̆ là jơnau yal, yal tơngkah lài ai gơnoar ătbồ tiah do in nàng di tŭ geh ală broă lơh sơndră wơl mờ ală jơnau gơlời wơl bơh trồ tiah lơh aniai digơlan gơlik geh tàm càr.

Jăt tàm bơta iăt kơno jơnau đơs bơh gơnoar ătbồ kơnhoàl Kon Plông mờ càr Kon Tum dê bal mờ cau ala măt bơh ală Ƀộ, ngàñ lơh broă geh gơnoar dê kung bè cau jak chài tàm gah broă do dê, Mpồl lơh broă bơh Mpồl đơng lam Dà lơgar bè rơcăng sơndră trồ tiah lơh aniai dê đơs là, tềng đăp măt pal tơrgùm tàm broă kờp sền ală bơta gơrềng mờ bơta aniai ngan ngồn bơh ală dơ̆ tơrluh ù mờ rơngô ù dê neh gơlik geh tàm kơnhoàl. Kờñ pal lơh pràn mblàng yal, hòi jà dong kờl làng bol mờ gơnoar ătbồ ƀòn lơgar gŏ geh bơta pơhìn, bơta aniai kung bè ală bơta gơrềng bơh dơ̆ tơrluh ù, rơngô ù dê nàng rơcăng lài pleh. Pleh nùs nhơm sền ờ sơ̆p, ờ rơcăng ngăc mơya bơta ndai kung pleh jơnau kơlôi rơcăng ir lơh gơrềng tus rài kis, bơtàu tơnguh lơh sa- mpồl bơtiàn mờ lơngăp lơngai bơta rơndăp tăp sèng bơh tiah do dê. Ồng Nguyễn Đức Quang, Kwang ătbồ Kụk Sơndră wơl mờ Bơsong jơnau gơlời wơl bơh trồ tiah lơh aniai mơkung là Phó Kwang ătbồ Cơldŭ lơh broă duh broă sùm Mpồl đơng lam Dà lơgar bè rơcăng sơndră trồ tiah lơh aniai, Kwang ătbồ Mpồl lơh broă do đơs sùm: Kờp sền wơl broă lơh sơndră wơl, yal jơh ală tơngume geh gơrềng tus sơndră wơl mờ tơrluh ù, jăt tàm ală sră pơ àr bơto pơlam bơh Mpồl đơng lam Dà lơgar bè Rơcăng sơndră trồ tiah lơh aniai mờ ală sră pơ àr bơto pơlam bơh Viện Vật lí Địa kầu dê, mờ bơh Ƀộ Xây zựng dê ai nàng ai gơnoar ătbồ, làng bol in gĭt nàng geh ală broă rơcăng lài pleh tơrmù ƀà hoàc hươr. Sồr ală anih lơh broă geh gơrềng pơgồp bal mờ anih lơh broă jak chài kơlôi sơnơng mhar jòi bàn jơnau bơh tài bè lơi mờ gơbàn tơrluh ù. Bơh mờng chài bơh Sông Tranh dê bol he gơtùi tơn rŭc lơyah tŭ tơngai kơlôi sơnơng, sền swì nàng gờñ ai geh jơnau đơs, gĭt nền dipal ngan rlau jơh, nàng geh broă lơh gơ in dipal, mhar, geh cồng nha mờ tềm pềr geh tŭ tơngai.

Bal mờ sơlơ pơgồp bal, rơcăng lài sơndră wơl mờ tơrluh ù nàng sền gàr ờdo ờdă màng kis, jơtài làng bol dê kung bè ală broă bơ̆t bơtàu tàm ù tiah kơnhoàl Kon Plông, càr Kon Tum, bè jŏ jòng, Mpồl lơh broă bơh Mpồl đơng lam Dà lơgar bè rơcăng sơndră trồ tiah lơha niai sồr Mpồl đơng lam Rơcăng sơndră Trồ tiah lơh aniai mờ Lòt jòi dong kờl rềs àr càr Kon Tum dê jàu ală anih lơh broă geh gơrềng bơh càr dê pơgồp bal mờ Viện Vật lí Địa kầu, ală anih lơh broă jak chài mhar lam kơlôi sơnơng bè bơta geh ngan tơrluh ù, rơngô ù. Viện Vật lí Địa kầu geh jơnau yal kờp sền mờ sền swì jơh ală bơta nàng Mpồl đơng lam Dà lơgar bè Rơcăng sơndră trồ tiah lơh aniai in tă pơgồp jơnau đơs mờ Cíñ phủ dan geh ală broă lơh bơsong jơh mờ jŏ jòng. Ală hìu măy pờ tơlik ồs đèng, bè: Thượng Kon Tum, Đăk Ring kung bè broă lơh tơnau bơtơ̆t dơng dà ndai pal geh kờp sền, lòt sền ală broă lơh nàng kờñ gàr niam ờdo ờdă ai tiah đah đơm in jăt gùng dà sền dờng màng ngan gơwèt mờ broă rơcăng sơndră tơrluh ù.

            Cau cih Khoa Điềm- Cau mblàng Lơ Mu K’Yến