VOV4.K’ho- Mho ngai 05/10, tàm Hìu lơh broă Quôk hội, Ủy viên Ƀộ Cíñ trị, Phó Củ tịc Thường trựk Quôk hội ồng Trần Thanh Mẫn neh geh dơ̆ wă Phó Củ tịc Quôk hội lơgar Lào, Củ tịc Ủy ƀan ring lơngai mờ tam klac lơgar Lào ồng Sommad Pholsena bal mờ mpồl kwang bàng Ủy ƀan ring lơngai mờ tam klac lơgar Lào lòt còp, lơh broă tàm lơgar Việt Nam.

Phó Củ tịc Quôk hội ồng Trần Thanh Mẫn wă Phó Củ tịc Quôk hội Lào, Củ tịc Ủy ƀan ring lơngai mờ tam klac lơgar Lào ồng Sommad Pholsena bal mờ ală kwang bàng

Đơs tàm dơ̆ wă, Phó Củ tịc Thường trựk Quôk hội ồng Trần Thanh Mần pà git, kwang đơng lam bồ Đảng, Dà lơgar, Quôk hội Việt Nam sùm dong kờl, lơh gơlik tơl bơta niam, bơta ƀuơn nàng ală mpồl lơh broă làng bol Việt Nam ngai sơlơ tơnguh rlau tai git gơp lơh bơyô mờ lơh broă bal mờ ală mpồl lơh broă làng bol Lào. Ring bal bè ală jơnau sồr geh ai tơlik bơh Phó Củ tịc Thường trựk Quôk hội ồng Trần Thanh Mẫn dê, Phó Củ tịc Quôk hội Lào ồng Sommad Pholsena pà git, đah lơgar Lào geh pơn jat tai mblàng yal, bơto bơtê mờ sền gàr bơta tam klac lơh bơyô kuơmàng đah 2 lơgar; sơlơ tơnguh tìp mat lơh kwèng niam chài, hòi jà kă bro, nhơl chờ.

VOV Tây Nguyên- Cau mblàng K’Duẩn