VOV4.K’ho- Rơndap broă lơh “Sơlơ tơnguh pràn jak tac phan hờ lơgar ndai ai mpồl lơh sa kă bro di mơ mờ dềt in tàm gah lơh phan tĕ, biap, plai chi Việt Nam” geh pơgồp bơnah lam lơh ngan ngồn jơnau kờñ ai broă tac hờ lơgar ndai ală phan bơh suơn sre, brê bơnơm, phan tàm dà geh rlau 50 tơmàn dolar Mỹ tàm nam 2025 mờ ai lơgar he gơ gơs là lơgar tac phan hờ lơgar ndai geh bơta niam uă tàm tiah ASEAN mờ tàm dunia. Do là jơnau tơnggit geh đơs tàm Pơrjum sơn đờm lam lơh rơndap broă lơh “Sơlơ tơnguh pràn jak tac phan hờ lơgar ndai ai mpồl lơh sa kă bro di mơ mờ dềt in tàm gah lơh phan tĕ, biap, plai chi Việt Nam” geh Liên đoàn Thương mại mờ Kông nghiệp Việt Nam pơgồp bal mờ Oxfam bơyai lơh drim ngai 06/5 tàm Hà Nội.

Tàm pơrjum, ală kwang bàng đơs là, tac hờ lơgar ndai biap, plai chi là dùl gùng dà niam ai ală mpồl lơh sa kă bro in mờ cèng wơl cồng nha lơh sa uă, mơya ờ hềt geh ngui jơh tŭ niam. Bè hơ̆ den tàng khà phan geh mat tàm ală tiah EU kung gam dùl êt ngan. Rơndap broă lơh do wèt tus sơlơ tơnguh pràn jak tac phan tàm drà kă bro EU ai ală mpồl lơh sa kă bro dềt mờ di mơ in tàm gah lơh phan tĕ, biap, plai chi; dong kờl bơtàu tơnguh drà kă bro mờ lơh bal mờ ală mpồl lơh broă bal EU nàng kờñ tơnguh tŭ niam tac hờ lơgar ndai; sơlơ tơnguh pràn jak bơh gah broă lơh dê mờ mat tiơng pơn rơ ală phan bơna bơh suơn sre Việt Nam dê.

Cau mblàng K’Duẩn