Gơ wèt mờ 135 hìu bơnhă làng bol kòn cau Jeh Triêng tàm thôn Dục Nhầy 1, xã tiah nhàr dà lơgar Đăk Dục, kơnhoàl Ngọc Hồi, càr Kon Tum den ală kwang bàng, cau ling Pôs đồng ling sền gàr tiah nhàr dà lơgar Dục Nông bè cau pròc mhàm tờm tàm hìu bơnhă.

Bi A Luật, dùl nă làng bol kis tàm thôn pà git: Làng bol ndrờm lời ai ală nùs nhơm niam ngan rlau jơh pah tŭ đơs tus kwang bàng, cau ling sền gàr tiah nhàr dà lơgar: “Pôs đồng ling sền gàr tiah nhàr dà lơgar sền gròi ngan tus ală hìu bơnhă kal ke. Dong kờl hơ̆ sồng dờp ròng ală oh dềt kal ke. Sùm sền gròi uă ngan tus làng bol tàm xã Đăk Dục. Añ gŏ là ală cau ling sền gàr tiah nhàr dà lơgar tàm do đềt mềr ngan, kis tàm sòr, sơrmah sơrmài tai”.

3 nam do, Mpồl đơng lam Pôs đồng ling sền gàr tiah nhàr dà lơgar Dục Nông neh sồr Thiếu tá Dương Văn Lương tus pơrjum tàm Ci ƀộ thôn, ngui niam nùs nhơm, kơnòl bơh cau ling sền gàr tiah nhàr dà lơgar dê gơ wèt mờ Đảng, mờ làng bol. Mò Xiêng Thị Túy, Ƀí thư Ci ƀộ, cau atbồ thôn Dục Nhầy 1 pà git, thiếu tà Dương Văn Lương neh tă pơgồp jơnau đơs Ci ƀộ in, ai tơlik ală Nghị quyết lơh gơlik bơta tam gơl niam ngan tàm broă lơh bơt bơtàu Đảng mờ tơnguh niam rài kis bơh làng bol dê.

Bơh bồ tơngai lơh broă tus tŭ do, Ci ƀộ thôn Dục Nhầy 1 neh tơmut đảng 2 nă cau in, tơnguh khà đảng viên Ci ƀộ gơguh tus 19 nă, tơrmù khà hìu bơnhă rƀah jơh gùt thôn gam mìng 6 hìu bơnhă: “Thiếu tá Dương Văn Lương tus bal jơh nùs ngan tàm broă tă pơgồp jơnau đơs bơt bơtàu, dong Ci ƀộ bơt bơtàu broă rơndap lơh hơ̆ sồng Nghị quyết bơh Ci ƀộ dê mờ tơngume pơrjum geh bơta li la rlau, niam rlau, gơ hòi gơ jà đảng viên tus bal. Bơdìh mờ ală broă hơ̆, Thiếu tá Dương kung jơh nùs ngan dong kờl làng bol, cau ling mờ làng bol kung đềt mềr rlau. Bơh tŭ geh cau ling tus bal pơrjum tàm Ci ƀộ den thôn kung geh khà jờng thôn sàng goh, kơ̆ kơljap, pràn kơldang, mờ ờ gam hìu bơnhă lơi lơh tìs adat boh lam tai”.

Sơlơ tơrbŏ kơ̆ rlau tai nùs nhơm đềt mềr ling klàng làng bol, bơt bơtàu mpồl rơcang gàr tàm làng bol kơ̆ kơljap, bơh nam 2020 tus tŭ do, Gah đơng lam Mpồl ling sền gàr tiah nhàr dà lơgar càr Kon Tum neh ntrờn sỹ quan, cau ling mờng chài tàm ală Pôs đồng ling sền gàr tiah nhàr dà lơgar ai 13 tàm 13 xã tiah nhàr dà lơgar rềp lơgar Lào mờ lơgar Campuchia. Tàm hơ̆, geh 4 nă kwang bàng Pôs đồng ling tus bal kâp ủy 4 kơnhoàl; 13 nă kwang bàng tus bal kâp ủy 13 xã tiah nhàr dà lơgar; 17 nă kwang bàng geh pồ tàm Hội đồng Ñân zân kâp càr, kơnhoàl, xã…

Trung tá A Ngọc Chiến, Pôs đồng ling sền gàr tiah nhàr dà lơgar Đăk Nhoong geh Gah đơng lam Mpồl ling sền gàr tiah nhàr dà lơgar càr Kon Tum ntrờn, sồr at gơnoar broă Phó Ƀí thư Đảng ủy, Kwang atbồ Ủy ƀan sền sơ wì xã tiah nhàr dà lơgar Đăk Nhoong, kơnhoàl Đăk Glei, càr Kon Tum pà git, bal mờ kâp ủy xã lơh kơ̆ kơljap, bơt bơtàu Đảng ƀộ kơ̆ kơljap, pràn kơldang, bi sùm kơlôi rơcang mờ broă dong làng bol sang bơhiàn ờ niam mờ tơnguh broă lơh sa nàng kờñ tơnguh niam rài kis: “Añ neh tă pơgồp jơnau đơs Đảng ủy in tơlik Nghị quyết đơng lam bồ mờ sồr Ủy ƀan Ñân zân, Mặt trận dà lơgar mờ ală mpồl cíñ trị mpồl bơtiàn dùl nùs bal lơh broă, tus bal tơn mờ sồr sền sơ wì wơl ală broă lơh bơtàu tơnguh lơh sa, kuơmàng là broă lam lơh sang tĕ ală bơhiàn ờ niam nàng lơh làng bol jơi bơtiàn dồ êt nă cau in brồ guh lik klàs rƀah kơ̆ kơljap jŏ jòng sùm. Mờ bơta krơi is là xã tiah nhàr dà lơgar, tiah brê rơcang gàr, bol hi đal git tam tờm chi lơh sơnơm lài ngan là kơnuh sơnơm Ngọc Linh, dơ̆ 2 là bol hi rơp lam lơh tam bơsềt Linh Chi nàng lơh gơlik broă lơh bơtàu tơnguh lơh sa geh cồng nha lơh sa uă”.

Tàm ală nam do, mờ nùs nhơm “Pôs đồng là hìu, tiah nhàr dà lơgar là ƀòn tờm, làng bol ală jơi bơtiàn là oh mi pròc mhàm tờm”, mpồl ling sền gàr tiah nhàr dà lơgar càr Kon Tum neh geh uă broă lơh ngan ngồn, sơlơ tơrbŏ kơ̆ nùs nhơm đềt mềr ling klàng làng bol tiah nhàr dà lơgar. Pơn rơ bè broă lơh “Bơt bơtàu thôn Đăk Ga, xã Đăk Nhoong, kơnhoàl Đăk Glei hờm ram, wil tơl, kơ̆ kơljap, pràn kơldang, lơngăp lơngai”; ală broă lơh drơng rài kis làng bol, bè: hìu măi đèng dà Đăk Giao/ Đăk Long; dà ngui sa hòr is Bờ Y, Đăk Long, Đăk Blô; broă lơh drơng lơh, dờp lơh oh mi mờ hìu bơnhă geh rài kis kal ke, dong brồ guh lik klàs rƀah; dong kờl 74 nă sau tàm broă lơh “Dong oh tus hìu bơsram”, 15 nă sau kòn ròng Pôs đồng ling sền gàr tiah nhàr dà lơgar…

Bơh bơta lòt bal, dong kờl bơh kwang bàng, cau ling sền gàr tiah nhàr dà lơgar dê, tus tŭ do neh geh 7 tàm kờp jơh 13 xã tiah nhàr dà lơgar bơh càr Kon Tum dê tơl khà ƀòn lơgar pa. Bal mờ hơ̆ là rài kis làng bol dê tàm tiah nhàr dà lơgar bơh càr Kon Tum dê gam ngai sơlơ bơtàu tơnguh, mpồl rơcang gàr tàm làng bol sơlơ kơ̆ kơljap rlau tai.