VOV4.K’ho - Drim òr (06/10), tàm ƀòn dờng Buôn Ma Thuột, càr Dăk Lăk neh sơn dờm dơ̆ pơrlòng Coh kơphe Việt Nam nam 2022 (Vietnam Amazing Roast Master 2022) geh Mpồl kơphe Buôn Ma Thuột bơyai lơh.

Cau pơrlòng cok khà rơwah tŭ mờ măi nàng pơrlòng coh kơphe

Dơ̆ pơrlòng geh bơta dờng dà lơgar, tơrgùm geh 35 nă cau tus bơh 13 càr, ƀòn dờng tàm gùt lơgar. Ală cau pơrlòng neh sơrlèt mờ ală tơngu me pơrlòng, tàm hơ̆ geh: sền wơl bơta niam kơphe gar; lơh jăt broă coh; lơh jăt broă klài. Bơta pa bơh dơ̆ pơrlòng do pơn drờm mờ ală dơ̆ pơrlòng coh dunia là ngui kơphe Robusta Việt Nam; cau pơrlòng pal lơh jăt broă klài phin mờ pal git 3 bơta: sền bơta bơkah kơphe gar, coh mờ klài dà kơphe. Dơ̆ pơrlòng geh bơyai lơh bơh ngai 06 tus ngai 09 nhai 10 nam 2022, mờ broă sền bơh Mpồl kỹ thuật geh 13 nă cau jăk chài geh broă mờng chài tàm ală dơ̆ pơrlòng kơphe. Mpồl ai khà pơrlòng geh 6 nă cau ai khà coh, klài Espresso (tàm hơ̆ geh 3 nă cau bơh dunia); 6 nă cau ai khà coh, klài phin.

VOV Tây Nguyên-Cau mblàng Ndong Brawl