VOV4.K’ho- Broă lơh “1 tơlak jơnau bơceh pa, lơh ngan sơrlèt gan kal ke, bơceh pa, lơh ngan kơryan gơtùi kòp Kovid-19” là dùl tàm ală broă lơh tờm gam geh Tổng Liên đoàn Lao động bơceh mờ lam lơh di Nhai kông ñân tàm nhai 5 do. Do ờ mìng là tŭ niam mờ gam ai tơnggŏ gơnoar broă, nàng kông ñân cau lơh broă in ngai sơlơ lơh ngan bơceh pa.

Bi Hoàng Anh Tuấn, cau lơh broă kỹ thuật gah Engineering, Kông ty TNHH Toyoda Boshoku, gơ wèt Tiah lơh sa mờ măi mok Nomora ƀòn dờng Hải Phòng 13 nam lơh broă tàm gah koh den geh tus 30 jơnau bơceh pa geh ngui tàm broă lơh. Mơya pơñ iờ să ngan rlau jơh mờ pal kah ngan rlau jơh gơ wèt tus mờ bi digơlan là tŭ tơngai jòi git, kơlôi sơnơng jơnau bơceh “Mòn broă lơh tơrmù tŭ tơngai camera đal git tiah phan lơh gơs tŭ koh”: “Bulah kông ty neh ai cau lơh broă nàng lơh tai mơya kung ờ tơl sơl. Dilah blơi tai 1 nơm măi pa den pal roh tus 7 tơmàn đông, mờ bè hơ̆ den kông ty pal lơh bơh 2 tus 3 nam tơnơ̆ hơ̆ sồng gơtùi ai wơl priă bơcri. Bơh hơ̆, añ kơlôi sơnơng bơta hoàc huơr tàm broă mòn phan bơna, ngan là tŭ tơngai camera đal git phan lơh gơs hoàc huơr, ai tơlik jơnau bơceh pa tơrmù tŭ tơngai camera đal git. Lài mờ tŭ lơh niam tŭ tơngai camera ơm wơl là 105 giây, tơnơ̆ hơ̆ añ tam gơl gam 92 giây”.

Jơnau bơceh pa geh kông ty ai gơnoar ngui tơrlòng lài bơh nhai 3 nam 2021. Tơnơ̆ tŭ cồng nha sền sơ wì bơta niam, jơnau bơceh pa bi dê neh geh kwang đơng lam bồ Kông ty dờp mờ ai ngui uă tàm kông ty bơh nhai 9 nam 2021 mờ kờp jơh bơta kuơ lơh gơlik là 3 tơmàn 800 tơlak đông pah nam. Hơ̆ là bơta pơn jờng dờng ngan nàng bi Tuấn in lơh ngan sơrlèt gan kal ke, bơceh pa uă rlau tai tàm tơngai tus.

Dùl jơnau bơceh pa geh pơn rơ ndai bơh bi Nguyễn Thanh Tuấn, kwang bàng atbồ tiah chŏ, kông ty kổ phần Chah Đèo Nai, Tập đoàn Chah phan kuơ tàm ù Việt Nam, là “Ngui phần mềm jơnau sồr cau đơng lam bồ dê pờ tơlik tàm internet”. Jơnau bơceh dong tơrmù tŭ jơ kơp gơn, tơnguh tŭ tơngai lơh broă geh kuơ bơh kông ñân cau lơh broă dê tàm broă lơh gơlik phan, tơrmù tŭ jơ cih sră mờ tê, tơnguh tŭ jơ chul chồl kông ñân lơh broă. Broă jơnau sồr bơh cau đơng lam bồ pờ tơlik tơn tàm internet dê kung pơgồp bơnah tơrmù priă tă ai khà dơ̆ rơndeh drơng broă jun, rò kông ñân mờ tơnguh jơnau git wă ngui kông nghệ thông tin ai kwang bàng, kông ñân cau lơh broă in. Bi Nguyễn Thanh Tuấn yal bè jơnau bơceh bi dê bè do: “Gah lơh chah bol hi geh bơta krơi is là lơh broă bòl glar, bè hơ̆ den tàng sơlơ tơrmù ƀà ală broă ờ duh pal geh den sơlơ tơnguh bơta niam phan bơna, chah là biàng jù bơh dà lơgar dê. Sơlơ geh uă tŭ tơngai ngui tàm broă lơh gơlik phan den niam rlau là sră pơ àr uă. Añ neh bal mờ ală oh mi tàm tiah tơnhàu chah nđờ jơt nam do, añ gŏ oh mi bòl ngan mờ priă jền là bơta pơn jờng lài ngan nàng añ sơnơng tus broă lơh tơrmù ƀà ală bơnah broă ờ duh pal geh mờ tơnguh cồng nha lơh broă ai oh mi in”.

Broă lơh “1 tơlak jơnau bơceh pa- lơh ngan sơrlèt gan kal ke, bơceh pa, lơh ngan kơryan gơtùi kòp Kovid-19” bơh Tổng Liên đoàn lao động Việt Nam dê ờ mìng gơ hòi gơ jà uă ngan cau lơh broă tus bal mờ gam sơn đờm lơh gơlik bơta bơceh pa nàng kông ñân, viên cứk, cau lơh broă geh tai bơta pơn jờng nàng lơh ngan, pơn đơl pràn, tơnguh cồng nha mờ bơta niam broă lơh. Ồng Trần Thanh Hải, Phó Củ tịc Thường trựk Tổng Liên đoàn Lao động Việt Nam, Kwang atbồ Mpồl đơng lam lam lơh Broă lơh “1 tơlak jơnau bơceh pa- lơh ngan sơrlèt gan kal ke, bơceh pa, lơh ngan kơryan gơtùi kòp Kovid-19” pà git: “Broă lơh “1 tơlak jơnau bơceh pa- lơh ngan sơrlèt gan kal ke, bơceh pa, lơh ngan kơryan gơtùi kòp Kovid-19” ai gŏ geh dùl kỹ thuật pa ngan, geh bơcri lơh bơh bơnàng jă kông nghệ, geh bơta kuơ dờng màng ngan rlau jơh tàm broă ai tơnggŏ jơnau bơceh pa bơh he dê tàm bơta geh ngan, ờ mìng ai gŏ cồng nha jơnau bơceh pa he dê tàm anih yal tơnggit pờ tơlik tơn tàm internet mờ kông đoàn neh bơt bơtàu. Bơnàng jă dơ̆ 2 là ai tơnggŏ bơta chài bơceh pa bơh cau lơh broă dê tàm tŭ tơngai lơyah lam lơh tàm tơngai lơyah, bol he lơh geh cồng nha rlau 250 rbô jơnau bơceh pa, bơta tam gơl pa bơh làng bol gùt lơgar dê tus bal, mờr ndrờm khà kờp bal bơh pah nam dê. Bơta do ai gŏ dilah bol he geh bơta pơn jờng dipal mờ ală broă lơh dipal, gơtùi tơnguh bơta chài, bơta pràn bơceh pa bơh cau lơh broă dê den bol he gơtùi lơh geh mờ lơh gơlik bơta tam gơl pràn ngan tàm srơh lơh broă bơceh pa bơh cau lơh broă dê”.

Tàm uă mpồl lơh sa kă bro, broă lam lơh, tơnguh srơh tàm pơrlòng lơh broă jak, lơh broă bơceh pa mờ tŭ do là “1 tơlak jơnau bơceh pa- lơh ngan sơrlèt gan kal ke, bơceh pa, lơh ngan kơryan gơtùi kòp Kovid-19” neh mờ gam dong mpồl kông ñân cau lơh broă tơnguh bơta pràn jak, bơta chài bơceh pa... Bơh hơ̆, pơgồp bơnah tơnguh cồng nha, bơta niam phan bơna, tơnguh cồng nha lơh sa kă bro, tă pơgồp kuơmàng ngan tàm bơta bơtàu tơnguh bơh mpồl lơh sa kă bro dê, gah lơh phan tiah mờ đoàn viên kông ñân cau lơh broă đơs is mờ tă pơgồp tàm bơta bơtàu tơnguh lơh sa mpồl bơtiàn đơs bal bơh dà lơgar dê.

Cau mblàng K’Duẩn