Rơndap broă lơh bơcri priă lơh Ƀlàng rơndeh par Quảng Trị geh Thủ tướng Cíñ phủ ring bal jơnau lơh nền bơcri priă lơh jat broă lơh lơh bal đah dà lơgar mờ cau dồ nă să. Rơndap broă lơh ơnàng rlau 265 lồ, kờp jơh priă bơcri rlau 5 rbô 800 tơmàn đông, drơng jơnau kờñ lòt rê tus 5 tơlak nă nac pah nam mờ 25 rbô 500 tấn phan bơna pah nam. Kờp dŭ tus nhai 7 nam 2026, Rơndap broă lơh rơp sơn đờm ai ngui.

Đơs tàm dơ̆ sơn đờm lam lơh, Phó Thủ tướng Cíñ phủ ồng Lê Thành Long đơs nền, Ƀlàng rơndeh par Quảng Trị neh geh Thủ tướng Cíñ phủ rơndap ù tiah là 1 tàm 30 ƀlàng rơndeh par gùt lơgar dê geh bơcri priă lơh lài mờ nam 2030. Ƀộ Giao thông Vận tải mờ ală Ƀộ, gah broă lơh, mpồl lơh broă geh gơ rềng pơn jat tai sền gròi, dong kờl mờ geh kơnòl bơsong di tŭ ală sră nggal mờ tă bơsong kal ke, kòl yan tàm tŭ lam lơh.