VOV4.K’ho - Drim òr (08/09), ƀòn dờng Hồ Chí Minh sơn đờm drà ràng tơlik nhơl chờ dunia ƀòn dờng Hồ Chí Minh nam 2022 (ITE HCMC 2022). Phó Thủ tướng Cíñ phủ ồng Vũ Đức Đam tus pơrjum sơn đờm, bal mờ rơlao 1 rơbô 500 nă kwang bàng là ala măt ală anih atbồ, cau jăk chài bè nhơl chờ, ală mpồl lơh sa kă bro nhơl chờ bơh 45 càr, ƀòn dờng tàm lơgar mờ 28 lơgar, kơnhoàl ù tiah.

                   Dơ̆ koh biài sơn đờm mŭt lơh drà ràng tơlik nhơl chờ dunia ƀòn dờng Hồ Chí Minh nam 2022

Mờ tơngu me “Kung pràn cơn đoà, kung gơguh”, Drà ràng tơlik dơ̆ do kơ̆p kờñ pờ geh rơlao 6 rơbô dơ̆ pơrgon kă bro đah cau blơi mờ ală mpồl ràng tơlik. Tàm broă ràng tơlik drà kă bro geh uă pơrjum cri bơyai dờng bè: pơrjum cri bơyai nhơl chờ dờng “Broă brồ guh mờ tơnguh bơtàu nhơl chờ dunia kơl jăp”, pơrjum cri bơyai “Chồl pràn drà kă bro năc nhơl chờ tơrgùm mờ bơta pràn bơh lơgar Việt Nam dê”, “Tam gơl sồ tàm nhơl chờ” mờ mpồl broă yal tơngit tiah tus. Tàm 3 ngai geh bơyai lơh drà ràng tơlik bơh ngai 08 tus 10 nhai 09, làng bol bal mờ cau năc nhơl chờ gơtìp jòi nàng git uă dơ̆ nhơl chờ, phan nhơl chờ tàm lơgar mờ dunia pa geh bal uă bơta pà niam.

Cau mblàng Ndong Brawl