VOV4.K’ho- Ngai 19/05, tàm ƀòn dờng Pleiku geh bơyai lơh dơ̆ ràng tơlik “Ală cồng nha bè cíñ trị, lơh sa, bơta niam chài rơgơi bơh càr Gia Lai dê”. Dơ̆ ràng tơlik do pờ tơlik tơngleh ală broă lơh gờm chờ 90 nam Ngai crơng gơs càr Gia Lai, geh bơyai lơh bơh  tŭ do tus jơh ngai 25/05. Mờ 240 rùp hin, sră cih, sră wăc sềr niam ngan geh ràng tơlik tàm ƀlàng Bảo tàng càr Gia Lai dê.

Làng bol ƀòn dờng Pleiku lòt sền dơ̆ ràng tơlik

Ràng tơlik “Ală cồng nha bè cíñ trị, lơh sa, bơta niam chài rơgơi càr Gia Lai dê” tơrgùm tàm 4 tơngume tờm, là: Tiah tềl lời wơl jòi sền phan kwơ yau dà lơgar Rộc Tưng- Gò Đá; Phan lời wơl dà lơgar kwơ màng Tây Sơn Thượng đạo; Tiah sền gàr brê bơnơm geh is  tiah kơh bơnơm Kon Hà Nừng mờ ală cồng nha lơh sa, mpồl bơtiàn, bơta niam chài rơ gơi càr Gia Lai dê tàm 90 nam crơng gơs mờ bơtàu tơnguh. Tàm hơ̆, pal sền gròi ngan là uă rùp hin, sră nggal kwơ ngan bè pôs đồng kăc màng K10, bàr pe dơ̆ tam lơh pha lin dờng màng bơh ling klàng mờ làng bol Gia Lai dê tàm rài tam lơh mờ bol sò tơm Mỹ mờ rài kis bơh làng bol Gia Lai dê tàm ală nam bơh chờm tơnơ̆ ngai tơngklàs dà lơgar nam 1975.

Cau mblàng K’Hạnh