VOV4.K’ho- Mho do, 09/8, tàm Hìu lơh broă Quôk hội, sơnđờm mut pơrjum dơ̆ 14 Ủy ƀan Thường vụ Quôk hội. Tàm pơrjum dơ̆ do, Ủy ƀan Thường vụ Quôk hội ai jơnau đơs bè jơnau kờp dŭ lài broă rơndap lơh bơcri priă dà lơgar dimơ tơngai kes priă dà lơgar tơngai bơh nam 2021-2025 ai ală rơndap broă lơh neh lơh sir sră nggal bơcri priă mờ bơtơl, tam gơl broă rơndap lơh bơcri priă di mơ tơngai kes priă dà lơgar tơngai bơh nam 2021-2025 bơh ală Ƀộ, anih lơh broă dà lơgar mờ ală tiah (dơ̆ 3). Ai jơnau đơs bơh sơn rờp bè rơdap cih jơnau yal cồng nha jat sền tơngume “Broă lơh jat broă lơh, adat boh lam bè lơh jat tềm pềr, rcang sơndră pơhì pơhà tơngai bơh nam 2016-2021” mờ bàr pe tơngume kwơ màng ndai.

Bơta pal sền gròi ngan tàm dơ̆ pơrjum do là, Ủy ƀan Thường vụ Quôk hội geh bơyai lơh broă lơh lùp mờ hơ jơnau lùp. Mpồl broă bơh sơnrờp geh Ủy ƀan Thường vụ Quôk hội lùp gơ wèt tàm gah broă bơh Ƀộ Kwang àng dê. Kơnòl hơ jơnau lùp tờm là Ƀộ trưởng Ƀộ Kwang àng ồng Tô Lâm. Mpồl broă dơ̆ 2 gơwèt gah broă niam chài, tàp pràn să jan mờ nhơl chờ. Kơnòl hơ jơnau lùp tờm là Ƀộ trưởng ồng Nguyễn Văn Hùng. Tàm dơ̆ lùp jơnau, ală Phó Thủ tướng mờ ală Ƀộ trưởng tus bal hơ jơnau lùp, mblàng lơh loh bè ală broă geh gơrềng tus 2 gah pa đơs do.

Cau mblàng K’Hạnh