VOV4.K’ho- Drim do, 23/05, tàm Hìu lơh broă Quôk hội, càr lơgar Hà Nội geh sơnđờm mut pơrjum dơ̆ 3, Quôk hội khoá 15. Jat kờp dŭ broă lơh dê, pơrjum geh bơyai lơh tàm 19 ngai, (kờp dŭ tơn jơh dơ̆ pơrjum tàm ngai 16/6/2022).

Do là dơ̆ pơrjum tơrgùm sơn rờp tơnơ̆ 2 nam gơrềng tài bơh kòp dờng Kovid-19. Pơrjum dơ̆ 3, Quôk hội khoá 15 geh bơyai lơh tàm tơngai gùt lơgar gam pơn jat tai lam lơh jat kràñ cê jơh nùs, jrô ơnàng, geh cồng nha Broă lơh jơh ală bơta rcang sơndră kòp Kovid-19 mờ Broă lơh bơtàu tơnguh wơl mờ bơtàu tơnguh lơh sa- mpồl bơtiàn; ngan là, Pơrjum dơ̆ 5 Ƀan Cấp hàñ Đảng dà lơgar khoá 13 pa tơn jơh niam bơnĕ cèng wơl ală bơta gơn kơnờm lơh ngan jơh nùs lơh jat geh cồng nha Nghị quyết Pơrjum dờng dơ̆ 13 bơh Đảng dê tàm dùl tơngai pa. Tàm dơ̆ pơrjum, Quôk hội sền sơ wì, ring bal 5 rơndap cih adat boh lam, 3 rơndap cih Nghị quyết mờ ai jơnau đơs tă pơgồp gơwèt 6 rơndap cih adat ndai. Quôk hội kung lời uă tŭ jiơ nàng sền sơ wì ală broă lơh sa- mpồl bơtiàn, kes priă dà lơgar mờ lơh nền uă broă kwơ màng ndai bơh dà lơgar dê.

Cau mblàng K’Hạnh