VOV4.K’ho - Pơrjum Ƀộ trưởng Giáo dục mpồl ASEAN dơ̆ 12 neh sơn đờm bơyai lơh tàm Hà Nội. Do là broă lơh tàm ală pơrjum Ƀộ trưởng, kwang bàng kấp dờng Giáo dục mpồl ASEAN dê geh Ƀộ Giáo dục mờ Đào tạo lơgar Việt Nam đơng lam tàm tơngai lơh broă là Củ tịc pơdar bal bơh broă bơto bơtê bal mpồl ASEAN nam 2022 mờ 2023.

Pơrjum Ƀộ trưởng Giáo dục Mpồl ASEAN dơ̆ 12

Tàm pơrjum Ƀộ trưởng Giáo dục mpồl ASEAN dơ̆ 12, Ƀộ trưởng ală lơgar tàm mpồl ASEAN tơrgùm cri bơyai bè broă bơto bơtê mờ bơsram bơh tơl lơgar dê, tam pà bal ală jơnau bơsram mùl màl, broă mờng chài mờ jòi geh broă lơh bal, gùng dà tơnguh bơtàu broă bơto bơtê mờ bơsram kơl jăp bơh tơl lơgar dê, tàm hơ̆ uă ngan là tàm bơta tơnơ̆ mờ kòp Kovid-19. Pơrjum kung tơrgùm broă lơh jăt ală broă lơh tàm mpồl broă rơndăp lơh bơto bơtê mờ bơsram mpồl ASEAN tơngai bơh nam 2021 tus 2025 mờ cri bơyai ală broă ndai tai.

Tơnơ̆ mờ pơrjum Ƀộ trưởng Giáo dục mpồl ASEAN dơ̆ 12, Ƀộ trưởng Ƀộ Giáo dục mờ Đào tạo lơgar Việt Nam ồng Nguyễn Kim Sơn đơng lam pơrjum Ƀộ trưởng Giáo dục mpồl ASEAN+3 (mờ ală lơgar lơh broă bal Hàn Quốk, Nhờk, Lo) dơ̆ 6 mờ pơrjum dờng Ƀộ trưởng Giáo dục Đông Á ASEAN-EAS (tàm hơ̆ geh ală lơgar tàm mpồl ASEAN+3 mờ ală lơgar lơh broă bal Mỹ, Australia, New Zealand, Nga, Ấn Độ) dơ̆ 6.

VOV.vn – Cau mblàng Ndong Brawl