Tàm 3 ngai lơh broă bơh Ủy ƀan Thường vụ Quốk hội geh pơgồp jơnau đơs mờ sền wơl, ring bal uă tơngu me kwơ màng. Tàm pơrjum Ủy ƀan Thường vụ Quốk hội geh pơgồp jơnau đơs bè broă tơn jơh, sền wơl broă lơh jăt Nghị quyết đah ală gah 525 bơh Ủy ƀan Thường vụ Quốk hội khoă 13 bè broă tìp cau tĕ khà bơh kwang bàng Quốk hội dê.

Pal kah ngan, tàm pơrjùm dơ̆ do, Ủy ƀan Thường vụ Quốk hội pơgồp jơnau đơs bè rơndăp broă lơh Adăt gùng lòt ù gờl mờ rơndăp broă lơh Adăt lơngăp lơngai tàm gùng lòt ù gờl; Tơn jơh pơrjum dơ̆ 5 mờ pơgồp jơnau đơs lài ngan bè broă rơcang pơrjùm dơ̆ 6 Quốk hội khoă 15. Bơdìh hơ̆ tai, Ủy ƀan Thường vụ Quốk hội gam sền wơl, ring bal rơcang cih Nghị quyết bè broă rơndăp tăp sèng ală anih lơh broă kấp kơnhoàl, kấp xã tơngai bơh nam 2023 tus 2030. Gơrềng tus broă jăt sền, tàm pơrjum do, Ủy ƀan Thường vụ Quốk hội iăt jơnau yal bè cồng nha jăt sền lài ngan bè tơngu me jăt sền bơh Ủy ƀan Thường vụ Quốk hội bè tam gơl pa broă bơto, sră măi pe kấp.