Mờ tơngu me “Ngui bơta pràn tam klăc gùt jơi bơtiàn, tơnguh broă lơh tờm, pơrlòng bơ̆t bơtàu mờ bơtàu tơnguh ƀòn dờng Hồ Chí Minh gơguh jăk, pa, nùs nhơm niam”, Pơrjum dờng dơ̆ do sền wơl ală broă lơh lơh pràn, ai tơngŏ ală broă lơh gam ờ pràn, ờ tơl, bơh tŭ hơ̆ ai geh ală jơnau bơsram broă mờng chài; ai geh lă jơnau kờñ, kơnòl broă tờm, ală broă lơh bơh Mặt trận Dà lơgar ƀòn dờng tơngai lơh broă bơh nam 2024 tus 2029.

Bơh tŭ hơ̆ nàng ngui gơnoar, bơngă bơh Mặt trận Dà lơgar dê tàm broă tơrgùm ală làng bol, tơnguh uă bơta pràn hòi jà bơh ală broă pơrlòng pơgồp bal mờ ală dơ̆ lam lơh; lơh jăt broă làng bol lơh tờm, lơh jăt broă jăt sền, geh jơnau đơs wơl, tus bal bơ̆t bơtàu Đảng, bơ̆t bơtàu gơnoar atbồ kloh niam, pràn kơl dang; ngui bơta pràn mpồl tam klăc gùt jơi bơtiàn tàm broă bơ̆t bơtàu, bơtàu tơnguh ƀòn dờng Hồ Chí Minh dê.