Drim do ngai 17/03 tàm Hà Nội, sơnđờm mŭt lơh Chờ drà ƀăo gùt lơgar nam 2023. Chờ drà ƀăo geh lơh tàm 03 ngai bơh ngai 17/03 tus ngai 19/03 mờ tơngume “Tam klăc- Mờng chài tàm broă lơh ờs mờng- Niam chài- Bơceh lơh”.

Chờ drà ƀăo gùt lơgar nam do mờ 87 cơldŭ ràng tơlik bơh 63 Mpồl Cau lơh ƀăo càr, ƀòn dờng, 60 anih lơh sră ƀăo Dà lơgar mờ ƀòn lơgar dê, bal mờ ală cơldŭ ràng tơlik mìng tơngume pơnrơ jak bơh ală Mpồl cau lơh ƀăo: Ƀăo Ñân zân, Anih Jơnau đơs Việt Nam, Anih Sơñio rùp Việt Nam, Yal tơngĭt jơnau Việt Nam, Ƀộ Thông tin mờ Truyền thông...mờ bơta tus bal lơh broă bơh mpồl ală anih bơto bơtê, tề lam sră ƀăo, tiah ràng tơlik bơh ală anih tăc phan ngui măy mok sră ƀăo- mblàng yal jơnau pa. Bơta niam ngan bơh Chờ drà ƀăo nam do dê là ală broă lơh bè broă lơh sră ƀăo, bè Cribơyai Tìp khà jờng A Sră ƀăo Dà lơgar geh pờ tơlik tơn tàm anih pờ tơlik jơnau đơs bơh Anih Jơnau đơs Việt Nam dê; Cribơyai A.I mờ ătbồ bơceh lơh tơngume tàm anih bơceh cih; Cribơyai Bơto bơtê mờ tề lam broă lơh sră ƀăo jăt jơnau kờñ...Bơh hơ̆, cau lơh ƀăo tàm jơh gùt lơgar mờ cau sền sră ƀăo in geh tŭ mblàng sền mờ lùp bơsram bơh ală jơnau cih sră ƀăo jak ngan, pơgồp bơnah tơnguh rlau tai sră ƀăo niam uă.