VOV4.K’ho- Wèt tus tơngkah 61 nam ngai rềs àr sơnơm khih dioxin lơh aniai tàm Việt Nam (10/8/1961– 10/8/2022), 75 nam Ngai cau ling sồt să- cau ling chơ̆t màng 27/07 mờ wèt tus Ngai tài bơh cau gơtìp rềs àr sơnơm khih dioxin lơh aniai 10/08, drim ngai 20/07, tàm Bảo tàng càr Kon Tum geh bơyai lơh dơ̆ sơnđờm mut lơh Ràng tơlik “Sơnơm khih dioxin- nùs nhơm mờ bơta di pal”.

Koh biài sơnđờm mut lơh ràng tơlik “Sơnơm khih dioxin- nùs nhơm mờ bơta di pal” Kon Tum nam 2022

Geh bơyai lơh bơh ngai 20/07 tus jơh ngai 25/08 tus, ràng tơlik “Sơnơm khih dioxin- nùs nhơm mờ bơta di pal” yal tơngĭt mờr 400 rùp hin, sră nggal, phan lời kir sơn rai mờ uă tơngume, bè: rềs àr sơnơm khih dioxin lơh aniai mờ bơta jê sồt bơh sơnơm khih dioxin dê; Việt Nam bơsong jơnau gơ lời wơl bơh rài tam lơh hóa họk; broă lơh bơh Mpồl cau gơtìp rềs àr bơh sơnơm khih dioxin dê lơh aniai tàm Việt Nam mờ gùng lòt jòi bơta di pal ai cau gơtìp rềs àr sơnơm khih dioxin in ....

Thượng tướng Nguyễn Văn Rinh, Củ tịc Mpồl cau gơtìp rềs àr sơnơm khih dioxin dê lơh aniai tàm Việt Nam pà phan cau gơtìp sơnơm khih dioxin in

Bơh ală rùp hin, sră nggal, phan lời kir sơn rai yal tơngĭt tàm dơ̆ ràng tơlik, làng bol, cau năc mờ gơ̆p bơyô dunia wă loh làng rlau tai bè jơnau gơ lời wơl bơh sơnơm khih dioxin dê lơh aniai gơwèt mờ tiah ơm kis, bơta pràn kơldang să jan kòn bơnus dê; bè ală bơta lơh ngan bơh Đảng, Dà lơgar, mpồl ling klàng, bơh Mpồl cau gơtìp rềs àr sơnơm khih dioxin dê lơh aniai tàm Việt Nam, bơh càr Kon Tum dê... tàm broă bơsong jơnau gơ lời wơl bơh dà sơnơm hoá họk dioxin tơnơ̆ rài tam lơh mờ sền gròi, dong kờl ală cau gơtìp rềs àr bơh sơnơm khih dioxin dê lơh aniai; tam klăc bal lơh ngan yal tơngĭt phàu crong lơh gơ sơ̆t dùl ròt, dong kờl lơh ngan jòi geh bơta di pal ai ală cau gơtìp sơnơm khih dioxin lơh aniai tàm Việt Nam in.

Cau mblàng K’Hạnh