Pal sền gròi tàm dơ̆ pơrjum do, Ủy ƀan Thường vụ Quôk hội bơyai lơh dơ̆ lùp mờ hơ jơnau lùp bè bàr pe tơngume gơwèt gah Anih cah rơña Làng bol dờng ngan rlau jơh mờ Viện Kiểm sát Làng bol dờng ngan rlau jơh. Kwang atbồ Anih cah rơña làng bol dờng ngan rlau jơh ồng Nguyễn Hòa Bình mờ Viện trưởng Viện kiểm sát làng bol dờng ngan rlau jơh ồng Lê Minh Trí hơ jơnau lùp tàm dơ̆ pơrjum. Tàm ală dơ̆ lùp mờ hơ jơnau lùp, ală Ƀộ trưởng Ƀộ: Kwang àng, Sền gàr Adat boh lam, Tổng Thanh tra Cíñ phủ tus bal hơ jơnau lùp, mblàng lơh loh bè ală broă geh gơrềng.

Kung tàm dơ̆ pơrjum do, Ủy ƀan Thường vụ Quôk hội tă pơgồp jơnau đơs bè bàr pe broă dờng gam geh jơnau đơs krơi is bơh rơndap broă lơh Adat Giă (tam gơl); rơndap broă lơh Adat cŏ giă priă (tam gơl); tă pơgồp jơnau đơs bè rơndap broă lơh Adat Dà (tam gơl); rơndap broă lơh Adat Atbồ, sền gàr broă bơt bơtàu sền gàr dà lơgar mờ tiah ling klàng; rơndap broă lơh Adat Hợp ták xã (tam gơl); rơndap broă lơh Adat Hìu ơm (tam gơl).