VOV4.K’ho- Drim ngai 28/06, Ƀan Cấp hàñ Đảng ƀộ ƀòn dờng Hà Nội sơnđờm mut pơrjum dơ̆ 8, sền sơ wì, ai jơnau đơs bè bàr pe tơngume, tàm hơ̆ geh broă lơh bơtàu tơnguh hìu ơm tàm ƀòn dờng Hà Nội, tơngai bơh nam 2021-2030; rơndap cih broă lơh lơh broă bơh Đảng ƀộ ƀòn dờng lơh jat Nghị quyết sồ 15 bơh Ƀộ Cíñ trị dê bè gùng dà broă lơh, kơnòl broă bơtàu tơnguh càr lơgar Hà Nội tus nam 2030, wèt sền tus nam 2045.

Đơs tàm dơ̆ sơnđờm mut pơrjum, bè broă lơh bơtàu tơnguh hìu ơm ƀòn dờng Hà Nội tơngai bơh nam 2021-2030, Ƀí Thư Thàñ ủy ồng Đinh Tiến Dũng pà gĭt rơndap cih broă lơh neh geh Mpồl đơng lam đảng Ủy ƀan Ñân zân ƀòn dờng cih niam ngan, nền nòn jat di mờ jơnau sồr, jơnau cih. Jơnau yal bơh Mpồl đơng lam đảng Ủy ƀan Ñân zân ƀòn dờng pà gŏ 6 nhai bồ nam, ƀòn dờng neh gròi sền niam kòp Kovid-19; ală broă lơh lơh sa, kă bro, nhơl chờ, hìu drơng broă ñô sa, hìu năc geh pờ mpồng wơl tàm bơta bè ờs wơl pa neh lơh geh bơta bơtàu tơnguh wơl, bơtàu tơnguh lơh sa. Tă dia dà lơgar tàm ù tiah ƀòn dờng dê gơguh rlau 20% pơndrờm dùl tŭ bal mờ nam 2021 mờ lơh geh mờr 57% jơnau kờp dŭ nam. Lơh sa gơguh kờp jơh phan bơna tàm ù tiah do dê 6 nhai do gơguh 7,79%, uă rlau 1,29 dơ̆ khà gơguh lơh sa dùl tŭ bal mờ nam 2021.

Cau mblàng K’Hạnh