Tus bal mờ đơs tàm dơ̆ sơnđờm mut pơrjum, ồng Nguyễn Trọng Nghĩa, Kwang bàng Ƀộ Cíñ trị, Kwang atbồ Ƀan Tuyên giáo Dà lơgar jờng rơ ală cồng nha mờ Anih jơnau đơs Việt Nam, ală Anih pờ tơlik jơnau đơs- Anih sơñio rùp càr, ƀòn dờng mờ ală rơnàng kwang bàng, cau lơh broă Gah pờ tơlik jơnau đơs Việt Nam neh lơh geh tàm tơngai pa do mờ hờn chờ ală cau cih jơnau, mpồl cau cih jơnau geh jơnau cih neh jak ngan mut tàm dar lồi dŭt dơ̆ pơrlòng pờ tơlik jơnau đơs gùt lơgar dơ̆ 16 dê.

Ồng Nguyễn Trọng Nghĩa đơs loh, pờ tơlik jơnau đơs sùm là dùl tàm ală phan ngui bồ tơngoh geh cồng nha ngan bơh Đảng, Dà lơgar dê; là rƀàng tàm tơrbŏ bal đah Đảng, Dà lơgar mờ làng bol dê, là dơ̆ pơrjum cribơyai nàng làng bol in tus bal jat sền, atbồ mpồl bơtiàn. Gah pờ tơlik jơnau đơs pal rcang di tŭ bơceh lơh rlau tai tàm broă lơh yal jơnau, mblàng yal jơnau, sền dờng màng broă jat tàm bơta geh ngan niam ngan bơh rài kis mpồl bơtiàn, bơh broă lơh tam gơl pa, crăp rcang lòt lài jòi gĭt broă dờng, broă pa, broă kal ke bơh Dà lơgar dê; mblàng yal gùng dà broă lơh bơh Đảng, adat boh lam bơh Dà lơgar dê tus mờ uă ngan ală rơnàng làng bol.