VOV4.K’ho- Drim ngai 13/10, pơrjum dờng Đoàn ơruh pơnu Kộng sản Hồ Chí Minh càr Gia Lai dơ̆ 15, tơngai lơh broă bơh nam 2022-2027 sơnđờm mŭt pơrjum mờ bơta tus bal bơh 250 nă cau dê, ala mat ai rlau 370 rơbô nă kwang bàng, đoàn viên càr dê. Mờ jơnau sồr lơh broă “Tam klăc bal– lam lài- ngăc ngar- bơceh pa- bơta kơ̆p kờñ”, Pơrjum dờng ai tơlik 13 broă jàu tờm tàm tơngai bơh nam 2022-2027. Dùl tàm ală tơngume hơ̆ là lơh jat geh cồng nha ală broă lơh, broă lơh dong kờl, dong kờl ơruh pơnu ờ pràn; pơn jat tai lơh jat niam ală broă lơh dong kờl kòn bơnus, dong kờl is tàm ƀòn lơgar nàng pơgồp bơnah tàm broă tơn jơh jơ gloh tơrmù rƀah mờ bơt bơtàu ƀòn lơgar pa tàm ală tiah.

Sơnđờm mŭt pơrjum dờng cau ala mat Đoàn ơruh pơnu Kộng sản Hồ Chí Minh càr Gia Lai dơ̆ 15

Bi Lê Trọng Phúc, Uỷ viên Ƀan Thường vụ Tỉñ đoàn Gia Lai, Ƀí thư Huyện đoàn Đức Cơ kơ̆p kờñ, pơrjum dờng geh dong broă lơh đoàn lơh geh jơnau kơ̆p kờñ bơh đoàn viên ơruh pơnu dê tàm tơngai lơh broă pa.

VOV Tây Nguyên- Cau mblàng K’Hạnh