VOV4.K’ho- Drim ngai 19/09, tàm Hìu lơh broă Quôk hội, Củ tịc Quôk hội ồng Vương Đình Huệ đơng lam mờ đơs sơnđờm mŭt pơrjum tơngume adat boh lam nhai 9 nam 2022 bơh Ủy ƀan Thường vụ Quôk hội dê nàng tă pơgồp bal jơnau đơs bè rơndap broă lơh adat lơh broă điện tử (tam gơl).

Sơnđờm mŭt pơrjum tơngume adat boh lam nhai 9 bơh Ủy ƀan Thường vụ Quôk hội  

Geh bơyai lơh tàm 5 ngai ngùl, tàm pơrjum do, Ủy ƀan Thường vụ Quôk hội ai jơnau đơs tàm 7 rơndap broă lơh adat mờ 2 jơnau rcang cih Nghị quyết, tàm hơ̆ geh rơndap broă lơh Adat ù tiah (tam gơl) nàng yal mờ Quôk hội in tàm pơrjum dơ̆ 4, Quôk hội khoá 15. Đơs sơnđờm mŭt pơrjum, Củ tịc Quôk hội ồng Vương Đình Huệ pà gĭt: rơndap broă lơh Adat ù tiah (tam gơl) geh cribơyai, ai jơnau đơs tàm 3 dơ̆ pơrjum. Quôk hội cribơyai tàm pơrjum dơ̆ 4 mờ sền sơ wì ring bal tàm pơrjum dơ̆ 6 tàm nhai 11 nam 2023. Củ tịc Quôk hội đơs loh, nàng rcang lài sền sơ wì rơndap broă lơh Adat, tus tŭ do Ủy ƀan Lơh sa mờ ală anih lơh broă bơh Quôk hội dê neh lam lơh uă dơ̆ pơrjum, cribơyai.

Cau mblàng K’Hạnh