VOV4.K’ho- Pơrjum dơ̆ 4, Quôk hội khoá 15 sơnđờm mŭt pơrjum yŭ rơyùm drim ngai do 20/10 tàm Hà Nội mờ kờp dŭ tơn jơh tàm ngai 15/11/2022. Jat broă lơh, drim do, 20/10 Kwang bàng Quôk hội ơn guàng bơkào mờ mŭt tàm Gơlang ƀồc iês ƀồc Củ tịc Hồ Chí Minh lài mờ tŭ bơyai lơh pơrjum rcang lài nàng cribơyai mờ pờ tê ring bal broă lơh pơrjum dơ̆ 4, Quôk hội khoá 15. Dơ̆ sơnđờm mŭt pơrjum ngan ngồn tàm tŭ 9 jiơ drim do, 20/10 tàm Hìu pơrjum Diên Hồng– Hìu lơh broă Quôk hội dê tàm Hà Nội mờ geh pờ tơlik tàm gah jơnau đơs, gah anih sơñio rùp tơn nàng cau tĕ khà mờ làng bol in iăt sền.

Ală kwang bàng Quôk hội geh cribơyai mờ lơh nền uă tơngume kwơ màng tàm dơ̆ pơrjum

Tàm pơrjum dơ̆ do, Quôk hội geh sền sơ wì, ring bal 7 rơndap broă lơh Adat: Adat Nhơm zờu (tam gơl); Adat rcang sơndră lơh pờng hìu bơnhă (tam gơl); Adat lùp sền (tam gơl); Adat lơh jat broă làng bol lơh tờm tàm ƀòn lơgar; Adat tam gơl, bơtơl bàr pe bơta bơh Adat Tần sồ vô tuyến điện; Adat Kham kòp, sơm kòp (tam gơl); Adat rcang sơndră tam gơl priă tìs gơ gơs priă di pal mờ adat boh lam (tam gơl); Nghị quyết ai lơh jat Jơnau pal jat pơrjum Quôk hội (tam gơl). 3 jơnau rcang cih Nghị quyết kung geh sền sơ wì ring bal, tàm hơ̆ geh: Nghị quyết bè lơh tơrlòng lài tiah ai gơnoar sac rơwah ngui ƀàng sồ rơndeh ôtô bơh broă lơh tàm pơrlòng giă; Nghị quyết bè lơh tơrlòng lài bàr pe broă lơh, broă lơh krơi is bơtàu tơnguh ƀòn dờng Buôn Ma Thuột, càr Dăk Lăk. Bơdìh hơ̆, Quôk hội geh lơh broă lơh jat sền jơnau yă; sền sơ wì, lơh nền ală broă lơh sa- mpồl bơtiàn mờ bàr pe broă kwơ màng ndai bơh dà lơgar dê.

VOV/Cau mblàng K’Hạnh