VOV4.K’ho- Drim ngai 3/10, tàm Hìu lơh broă Đảng dà lơgar, pơrjum dơ̆ 6 Ƀan Cấp hàñ Đảng dà lơgar khoă 13 neh ngan ngồn sơnđờm mŭt pơrjum bơh bơta đơng lam bơh Tổng Ƀí thư ồng Nguyễn Phú Trọng. Tổng Ƀí thư ồng Nguyễn Phú Trọng neh tơngkah 5 broă nàng dà lơgar in cribơyai.

Tổng Ƀí thư ồng Nguyễn Phú Trọng đơs tàm dơ̆ sơnđờm mŭt pơrjum

Tàm hơ̆, broă sơn rờp là sền sơwì ală bơta lơh sa-mpồl bơtiàn, kes priă dà lơgar nam 2022, kờp dŭ lài broă rơndap lơh bơtàu tơnguh lơh sa – mpồl bơtiàn, kes priă dà lơgar nam 2023, Tổng Ƀí thư ồng Nguyễn Phú Trọng sồr, Dà lơgar kơlôi sơnơng gơ in nền nòn ngan jơnau yal, Sră yal bơh Mpồl đơng lam Đảng Cíñ phủ mờ bơta geh ngan tàm Ƀộ, ngàñ, ală tiah tiah lơh broă dê, tơrgùm cribơyai, mblàng sền nền nòn ală bơta geh uă bơh nam 2022 dê, lơh loh ală cồng nha neh lơh geh; ală bơta lơh ờ hềt lơh geh, ală bơta ờ hềt pràn; kờp dŭ lài bơta digơlan gơlik geh mờr tus. Sền ngăc mờ ală jơnau kờñ, kơnòl broă neh sồr nàng rcang sơndră, gròi sền geh cồng nha kòp, mơkung bơtàu tơnguh wơl, bơtàu tơnguh lơh sa- mpồl bơtiàn, ngan là lơh lài broă gròi sền roh bơngă giă priă, gàr kơ̆ kơljap lơh sa dờng, gàr niam lơngap lơngai mpồl bơtiàn.

VOV Tây Nguyên- Cau mblàng K’Hạnh