VOV4.K’ho- Cơldŭ lơh broă Duh broă sùm Mpồl đơng lam dà lơgar bè rơcăng sơndră trồ tiah lơh aniai pa geh Sră sồr mhar pơyua tus Mpồl đơng lam rơcăng sơndră trồ tiah lơh aniai mờ jòi dong kờl rềs àr càr Lâm Đồng in bè sơndră wơl mờ mìu, dà tih tiah dà dờng Cam Ly. Jăt jơnau yal bơh Anih tờm yal tơngĭt lài trồ tiah dà ia dà lơgar dê yal, bơh ngai 20- 23/05, tiah Tây Nguyên geh mìu sơr mờ kơnàs, bàr pe tiah geh mìu dờng tus dờng ngan.

Nàng rơcăng lài lơh ală broă lơh sơndră wơl mờ dà tih gơguh mhar sùm gơbàn tàm tiah dà dờng Cam Ly, Cơldŭ lơh broă duh broă sùm Mpồl đơng lam dà lơgar bè rơcăng sơndră trồ tiah lơh aniai sồr Mpồl đơng lam rơcăng sơndră trồ tiah lơh aniai mờ jòi dong kờl rềs àr càr Lâm Đồng jăt sền nền ală jơnau yal tơngĭt lài bè trồ tiah, yal lài bè mìu, dà tih, dà cò, tơrlah ù nàng yal dĭ tŭ ai ală kâp gơnoar ătbồ, làng bol mờ ală anih drơng broă nhơl chờ, năc lòt nhơl, ngan là cau lơgar ndai, rơcăng lài ală broă lơh rơcăng pleh dipal, gàr niam ờdo ờdă ai kòn bơnus, phan bơna mờ lơh sa in.

Ai mpồl lam lài rơcăng sơndră trồ tiah lơh aniai tàm ƀòn lơgar lòt sền, kờp sền ală tiah làng bol ơm kis tiah thòng lơyah, tiah geh pơhìn tơrlah ù kềng gah dà dờng Cam Ly, lòt gan ală kơnhoàl Đức Trọng, Lâm Hà, mờ ƀòn dờng Dà Làc nàng rơcăng lài lam lơh, ntrờn làng bol tŭ geh dà tih dờng gơlik geh, toah wàs rbòng dà hòr, rơcăng sơndră tơrlah ù.

Cau mblàng Lơ Mu K’Yến