VOV4.K’ho- Drim do 26/04 geh lơh Pơrjum làm gah tiah ASEAN mờ sồr mhar lơh jăt Tŭ tơngai lam lơh jăt Jơnau yal bơr Hà Nội bè tơngume Broă lơh mpồl bơtiàn, wèt tus dùl Mpồl bơtiàn ASEAN tam klăc bal mờ rơcăng lài gơrờm bal. Broă lơh bơh Ƀộ Lao động, Thương ƀiñ mờ Xã hội pơgồp bal mờ Kes priă Kơnòm dềt Liên hợp quôk bơyai lơh bal mờ bơta geh măt bal bơh ală lơgar tàm tiah ASEAN dê jăt broă lơh pờ tơlik tơn tàm internet.

Tus bal pơrjum, ală kwang bàng geh tơrgùm cribơyai ală tơngume, tàm hơ̆ geh: Tơnguh jơnau gĭt wă mờ kơnòl bơh ală gah geh gơrềng dê bè Jơnau yal bơr Hà Nội mờ tơnguh broă lơh mpồl bơtiàn, bal mờ Tŭ tơngai lơh jăt Jơnau yal bơr; cribơyai bè gơnoar broă bơh cau lơh broă mpồl bơtiàn dê tàm ală gah broă lơh bơto bơtê, lơh sơnơm mờ ătbồ trồ tiah lơh aniai; lơh gơs ală jơnau kơlôi lơh tờm nàng lơh gơs bơto pơlam bè gơnoar broă broă lơh mpồl bơtiàn tàm ală anih lơh broă mìng gah do mờ khà kwang bàng lơh broă mpồl bơtiàn tàm ală dà lơgar tàm tiah ASEAN.

Cau mblàng Lơ Mu K’Yến