Ồng Nguyễn Ngọc Ánh, Kwang atbồ Gah lùp sền càr Lâm Đồng pa gơtìp Anih kảñ sát lùp khàu Ƀộ Kwang àng tơlik Kơrnuat lah yă cau lơh tìs, tơlik kơrnuat kup jàm ing mờ mut sền anih ơm tàm sơnah ƀòn 3, ƀòn dờng Dà Làc nàng lùp khàu bè tìs dờp phan sa kuề sa kuà. Ồng Ánh geh đơs là geh gơ rềng tus broă lơh tìs tàm tŭ đơng lam, tơlik jơnau đơs pơn dut lùp sền bè ală broă lơh tìs tàm atbồ, ngui ù, jàu ù, jàu brê tàm dùl rơndap broă lơh dờng tàm kơnhoàl Đức Trọng, càr Lâm Đồng.

Ồng Ánh là đảng viên pơrjum tàm Ci ƀộ Lùp sền càr Lâm Đồng, gơ wèt Đảng ƀộ Gah ală anih lơh broă càr Lâm Đồng. Tàm pơrjum, Ƀan Thường vụ Tỉñ ủy Lâm Đồng ring bal sồr Đảng dà lơgar tơlik bơdìh Đảng gơ wèt mờ ồng Nguyễn Ngọc Ánh.