Phan lời wơl Niam chài Dunia Hội An, càr Quảng Nam ală ngai lồi nam 2022, tàm ală gùng drà yau gal ngan năc dunia lòt nhơl. Hìu ñô sa dờng, hìu năc mờ ală drơng broă sơlơ duh hồl. Kal ke ngan cau lơi gĭt là, dùl nam lài do, gùng drà yau Hội An ñhòt ngan cau, ngềt ngơ̆t ngan. Ƀòn dờng geh tus 2/3 khà kờp làng bol lơh broă tàm gah nhơl chờ neh sơrlèt gan rlau 2 nam bòl glar kal ke, rài kis làng bol dê gơtìp gơ tam gơl tài bơh kòp dờng Kovid-19. Tŭ do, Hội An neh lơh geh wơl rùp să bơh dùl ƀòn dờng nhơl chờ dê, ndrờm bè ờ hềt tŭ lơi geh “dơ̆ kòp dờng lơh bơtờp pràn ngan” lơi lơh bơtờp tàm do.

Bi Nguyễn Thanh Tâm, cau tờm hìu kuơ̆ An, ƀòn dờng Hội An ờ ru ngan mờ broă rơcăng broă lơh wă rò năc lòt nhơl tàm dơ̆ sa tềp Tây mờ Sa tềp bơhiàn Qúy Mão. Jăt bi Nguyễn Thanh Tâm yal, pơgăp tŭ tơngai kal ke tàm 2 nam do neh dong cau lơh broă nhơl chờ tàm Hội An kwèng mờ lơh pa is să jan he dê nàng pơn jăt tai bơtàu tơnguh nhơl chờ jăt gùng dà kơ̆ kơl jăp, lơh jăt broă lơh nhơl chờ tơlir. Bulah Ală broă jàu nhơl chờ tơlir pa geh càr Quảng Nam pa ai lơh jăt tàm nhai 3 nam pa do, mơya tàm bơta geh ngan, uă ngan anih lơh sa kă bro nhơl chờ tàm Hội An neh lơh jăt ală broă jàu do bơh jŏ ngan. Mùl màl, bè đơs ờ mờ sồ siă đù sang bơdìh, ờ huan ngui kơldung, hồp đù dùl dơ̆, lơh nhơl chờ đềt mềr mờ tiah ơm kis. Bi Nguyễn Thanh Tâm pà gĭt, bơh sơnrờp cau drơng broă mờ jơh bal cau năc lòt nhơl ndrờm gơlơh krơi ngan ờ huan kwèng ngan, uă cau ờ dùl nùs bal mơya kơnờm bơh kơ̆ nùs lơh jăt den tàng tŭ do neh gơ gơs mờng kwèng. Bi Nguyễn Thanh Tâm, đơs: Gùng dà tŭ do bơh năc lòt nhơl bơh lơgar ndai dê mờ ală bơyô kơnòm să lơgar Việt Nam ndrờm geh ngan bơta gĭt wă bè sền gàr tiah ơm kis. Tŭ khi sền gŏ he neh lơh jăt geh gùng dà do den khi dùl nùs bal ngan.

Rlau 2 nam do, kòp dờng Kovid-19 neh lơh 42 rbô nă cau lơh broă tàm gah broă lơh nhơl chờ tàm ƀòn dờng Đà Nẵng roh broă lơh. Khà do tàm 2 càr: Thừa Thiên- Huế, Quảng Nam pơgăp bơh 14 rbô tus 18 rbô nă cau lơh broă. Bulah bè hơ̆, tơnơ̆ tŭ pờ mpồng wơl ală broă lơh nhơl chờ, nam 2022, càr Quảng Nam neh wă rò rlau 4 tơlak 800 rbô nă cau năc lòt nhơl mờ kờp jơh priă lơh geh bơh broă lơh nhơl chờ geh pơgăp 3 rbô 800 tơmàn đong, lơh geh broă lơh broă sa ai rlau 16 rbô nă cau lơh broă in. Ồng Phan Hộ, Kwang ătbồ Mpồl ătbồ phan lời wơl niam chài Mỹ Sơn pà gĭt, bulah kal ke mơya mpồl do neh lơh ngan ai sùm broă lơh ai 125 nă cau lơh broă in. Tŭ pờ mpồng wơl, Mỹ Sơn neh wă rò rlau 105 rbô nă năc lòt nhơl, gơguh rlau 110% pơndrờm mờ broă rơndăp lơh nam 2022. Ông Phan Hộ, đơs: Tàm jơh gùt tŭ tơngai kong gơrềng boh kòp bơtờp dê, bol añ ờ lơh geh priă jền lơi. Gơwèt mờ mpồl rơcăng is jơh ală bơta bè priă jền là kal ke ngan. Bol añ pơndờm pơnđiang mpồl kwang bàng, cau lơh broă mơkung ngui priă rơcăng lài tơm đau priă nhai êt ngan pal geh ai khi in. Mpồl kwang bàng, cau lơh broă pin dờn tàm mpồl lơh broă mờ khi kung lơh ngan bal pơđơl pràn bal nàng sơrlèt gan kal ke.

Việt Nam ơm tàm sră cih mat ală lơgar  pờ mpồng gờñ ngan rlau jơh kơnhoàl ù tiah do mờ geh Mpồl Nhơl chờ Dunia đơs là geh gùng dà broă lơh pờ mpồng sơrmah sơrmài ngan rlau jơh. Nam 2022, ală càr, ƀòn dờng tiah tàm gùl lơgar rơcăng lài bơyai lơh ală broă lơh dờng ndrờm pal mờ dunia; lam lơh uă broă lơh hòi jà, mblàng yal jơnau tus mờ ală drà câu Âu, ală lơgar: Hàn Quôk, Singapore, Ấn Độ, Nhờk, rơhời ai par wơl ală gùng rơndeh par dunia. Tàm ƀòn dờng Đà Nẵng, sùm sùm ală gùng par dunia par tơn tus Đà Nẵng geh ai par, lơh wơl tơnơ̆ tŭ tơngai ơm ing neh tàm tơrbŏ bal drà năc nhơl chờ dunia. Jăt khà kờp bơh Tổng Kụk Nhơl chờ lơgar Việt Nam dê, nam 2022, mpồl năc dunia lòt nhơl tus Việt Nam geh 3 tơlak 500 rbô nă. Dùl tàm ală broă lơh kwơmàng nàng gơhòi gơ jà năc dunia lòt nhơl là pơn jăt tai lơh pa anih tus, lơh pràn lơh bal nhơl chờ mờ uă càr, ƀòn dờng tàm jơh gùt lơgar. Ồng Lê Trí Thanh, Củ tịc Ủy ƀan Ñân zân càr Quảng Nam pà gĭt, lơh bal bơtàu tơnguh nhơl chờ tơlir là gùng dà ờ gơtùi pleh klàs, ờ mìng dong ală tiah lơh niam geh bơta ƀươn is mờ gam lơh geh ală bơta kwơ bal bè phan kwơ geh is, phan lời wơl niam chài tàm kơnhoàl ù tiah do, pơgồp bơnah dong gah nhơl chờ bơtàu tơnguh kơ̆ kơl jăp. Ồng Lê Trí Thanh, đơs: Bol añ neh lơh ală bơnah phan kơnờm jơh tàm phan geh is, lơh geh ală bơta kwơ mờ brê bơnơm phan geh is ai pà càr Quảng Nam in kung bè bơta kwơ bè niam chài, kơnhoàl ù tiah, kòn bơnus mờ Quảng Nam geh uă bơta pràn. Mơkung rơ̆p lơh bal mờ ală tiah ndai tàm Tiah lơh sa tờm kwơmàng tiah tàm gùl lơgar gơ jăt bal mờ lơh ală phan bơna dipal nàng yal tơngĭt ràng tơlik ală phan bơna nhơl chờ tơlir mờ gơ̆p bơyô dunia in.

Tàm Dơ̆ bơyai lơh Khà jờng Nhơl chờ Dunia nam 2022- tiah câu Á mờ câu Đại Dương, Nhơl chờ Việt Nam neh dờp geh 16 khà jờng nhơl chờ, pơn jăt tai đơs nền mat kă bro, gơnoar broă mờ bơngă bơh nhơl chờ Việt Nam dê tàm tiah do mờ tàm jơh gùt dunia. Ồng Đoàn Văn Việt, Thứ trướng Ƀộ Văn hoá, Thể thao mờ Zu lịc đơs nền, broă bơyai lơh gơtùi Nam Nhơl chờ Dà lơgar- Quảng Nam 2022 neh cèng wơl cồng nha uă tàm broă gơhòi gơ jà bơcri priă, bơtàu tơnguh phan bơna nhơl chờ mờ broă lơh hòi jà yal tơngĭt ràng tơlik rùp să, dà lơgar, kòn bơnus Việt Nam, lơh gơlik geh pang rùp bềng rùp să mờ lơh gơkờñ ngan bơh gah nhơl chờ Việt Nam dê tŭ tơn jơh wơl broă lơh nhơl chờ nam 2022 wèt tus nam 2023 bềng bơta gơdan, gơn kơnờm tàm pơn jăt tai ală cồng nha.