Tàm mang ngai 19/07 tơn, Gah Pờ tơlik jơnau đơs mờ sơñio rùp lơgar Nhờk NHK pờ tơlik dùl jơnau cih mờ jòng, tàm hơ̆ đơs ngan ală dà kơl hề bơh Tổng Ƀí thư ồng Nguyễn Phú Trọng dê gơwèt mờ broă lơh bơt bơtàu, sền gàr mờ bơtàu tơnguh Dà lơgar bơh lơgar Việt nam dê bal mờ ală tă pơgồp kwơ màng tàm bơta gĭt gơ̆p cribơyai broă mờ lơgar ndai mờ ală lơgar tàm hơ̆ geh bal lơgar Nhờk. Jơnau cih ngui ală rùp hin jơnau prăp lời wơl kwơ màng bè Tổng Ƀí thư dê, bè: bơta geh mat bơh Tổng Ƀí thư dê tàm ală broă lơh dờng, dơ̆ tìp mat kấp dờng mờ Kwang atbồ lơgar Mỹ ồng Joe Biden, tìp mat cribơyai mờ Tổng Ƀí thư- Củ tịc lơgar Lo ồng Tập Cận Bình, tìp mat rềp mềr mờ bồc Thủ tướng lơgar Nhờk lài do dê ồng Shinzo Abe....

Jơnau cih đơs wih đơs wơl: “Tổng Ƀí thư ồng Nguyễn Phú Trọng là kwang đơng lam bồ dờng, neh lơh uă gơnoar broă kwơ màng. Ồng là cau chồl tơnguh pràn kơl dang broă lơh rcang tam dră mờ rcang lài kơryan sa kuề sa kuà bơh lơgar Việt Nam dê, lơh pràn lơh glài jơh bal ală kwang bàng kấp dờng ngan rlau jơh tàm anih lơh broă cíñ trị dê. Bè cribơyai broă mờ lơgar ndai, tàm tơngai dunia gam rơ hời tam pà gơs 2 đah, ồng kung gam gàr niam sùm broă lơh lơh broă mờ lơgar ndai rề ơnàng, lơh bơyô mờ uă lơgar, lơh uă bơta gĭt gơ̆p mờ ală bơta gĭt gơ̆p cribơyai broă mờ lơgar ndai, tơngŏ bơta kơ̆p kờñ lơh bơyô bal mờ jơh ală lơgar mờ kơnhoàl ù tiah tàm dunia dê. Bè bơta gĭt gơ̆p mờ lơgar Nhờk, jơnau cih đơs wơl dơ̆ tìp mat bơh Tổng Ƀí thư mờ ƀồc Thủ tướng lài do lơgar Nhờk dê ồng Shinzo Abe. Tàm hơ̆, 2 nă kwang đơng lam bồ đơs nền dùl dơ̆ tai rơ̆p pơn jat tai rề ơnàng bơta gĭt gơ̆p lơh broă bal đah 2 gah. Pang ƀăo lơh sa lơgar Nhờk (Nikkei) kung yal ală jơnau yal ndrờm bè gah NHK sơl mơya đơs tai ală tă pơgồp bơh Tổng Ƀí thư dê ai broă lơh bơtàu tơnguh lơh sa bơh Việt Nam dê, tàm hơ̆ đơs ngan gùng broă lơh lài ngan geh gơrềng tus broă Việt Nam kĭ Hiệp địñ kă bro khat gơboh mờ uă lơgar mờ đơs ngan: “Tổng Ƀí thư là cau lơh rài lơh sa Việt Nam dê bơtàu tơnguh pràn kơl dang”.