Lơh jat srơh tàm pơrlòng sơm bat tê bal bơt bơtàu ƀòn lơgar pa, sơm bat tê bal tài cau rƀah, 5 nam do, mpồl phàu crong càr Dăk Lăk neh hòi jà rlau 2 rơbô 300 dơ̆ kwang bàng, cau ling mờ mờr 20 rơbô ngai lơh broă dong làng bol tiah is ồn kal ke ngan. Hòi jà tă pơgồp rlau 1 tơmàn đong lơh hìu ơm ai ală hìu bơnhă geh sră dong kờl dà lơgar, blơi kòn sơntìl, phan ròng, phan ngui drơng rài kis lơh broă sa ai ală hìu bơnhă rƀah in. Tàm tơngai kòp dờng Kovid-19, mpồl phàu crong càr dê neh pơgồp bal mờ ală anih lơh broă mpồl cíñ trị mpồl bơtiàn hòi jà tă pơgồp 3 tơmàn đong dong làng bol gơtìp kal ke mờ uă broă lơh geh cồng nha.

Tus bal mờ đơs tàm pơrjum dờng, Trung tướng ồng Thái Đại Ngọc, Kwang bàng Đảng dà lơgar, Tư lệñ Quân khu 5 jờng rơ uă ngan, jờng rơ ală srơh tàm pơrlòng pà khà jờng, tàm pơrlòng lơh tus geh bơh mpồl phàu crong càr Dăk Lăk dê tàm 5 nam do. Ală nam tus, bơta tàm dunia, tàm tiah do kờp dŭ lài rơ̆p pơn jat tai geh ală bơta gơlik geh kal ke, ờ gơtùi gĭt lài, tàm ù tiah Quân khu, ngan là ù tiah Tây Nguyên kung gam là dùl tàm ală tiah tờm digơlan geh uă bơta pơhìn roh bơta kơ̆ kơl jăp. Ƀộ Tư lệñ Quân khu sồr Đảng ủy- Mpồl duh broă tàm pơrlòng pà khà jờng, Gah đơng lam ling klàng càr Dăk lăk tơrgùm đơng lam, sồr lơh jat niam ală tơngume tờm.  Trung tướng ồng Thái Đại Ngọc, đơs: “Bơsram lơh jat jrô bồ tơngoh bơh Củ tịc Hồ Chí Minh dê bè tàm pơrlòng kờñ gơboh dà lơgar; lơh ngan ngồn “5 jơnau lơh nền ngan, 5 rcang lài” mờ Tổng Ƀí thư lài do ƀồc ồng Nguyễn Phú Trọng dê; ală sră nggal geh gơrềng tus adat boh lam bè lơh jat broă lơh tàm pơrlòng, pà khà jờng. Lơh ai tơl nă kwang bàng, cau ling, cau lơh broă in gĭt wă jrô gơtha, bơta kwơ màng bơh broă lơh tàm pơrlòng, pà khà jờng mờ srơh tàm pơrlòng lơh tus geh, do là srơh lơh broă kăc màng bơh “Cau ling Wa Hồ dê”, bơta pơn rơ ngan, jak ngan is bơh Mpồl ling klàng làng bol Việt Nam dê”.

Tàm càr Dăk Nông, 5 nam do, srơh tàm pơrlòng lơh tus geh bơh mpồl phàu crong càr dê neh lơh geh bơta gơn kơnờm tơnguh uă bơta niam tơrgùm bal, bơta pràn tam lơh, pơgồp bơnah kwơ màng lơh jat ală jơnau kờñ bơtàu tơnguh lơh sa, mpồl bơtiàn, bơt bơtàu kơ̆ sền dà lơgar mờ bơta lơngăp lơngai. Tàm 5 nam, neh geh gĭt nđờ jơ̆t rơbô dơ̆ kwang bàng, cau ling dong kờl làng bol tiah kal ke; hòi jà tă pơgồp geh rlau 5 tơmàn 600 tơlak đong lơh 78 nơm hìu tàm klăc dờng; dong kờl 1 tơmàn 400 tơlak đong lơh geh broă lơh sa dong ală hìu bơnhă rƀah in brồ guh; kham sơm kòp ờ sa priă ai mờr 1 rơbô 900 nă làng bol tàm tiah sar lơgar ngài in.

Tàm tơngai bơh nam 2019 - 2024 jơh gùt càr rơ wah, yal tơngĭt 67 mpồl cau, cau dồ nă să pơn rơ jak ngan tơl làm tàm tơl bơta lơh broă. Tàm 5 nam do geh 31 dơ̆ mpồl cau geh Ƀộ Ling klàng mờ Quân khu 5 dờp mpồl ling kơ̆ kơl jăp pràn kơl dang tơl làm “lam lài mờ pơn rơ jak ngan”.

Tàm pơrjum dờng, Trung tướng ồng Thái Đại Ngọc, Tư lệñ Quân khu 5 jờng rơ mpồl phàu crong càr Dăk Nông neh tàm klăc bal,  rcang lài, bơceh lơh lam lơh tơl làm ală srơh tàm pơrlòng lơh tus geh. Tàm bơta pa, Trung tướng ồng Thái Đại Ngọc sồr Đảng ủy, Gah đơng lam ling klàng càr Dăk Nông pơn jat tai bơsram lơh jat jrô bồ tơngoh bơh Củ tịc Hồ Chí Minh dê bè tàm pơrlòng kờñ gơboh dà lơgar. Trung tướng ồng Thái Đại Ngọc, đơs:“Sền gròi sền gŏ, tề lam, mblàng yal, rề ơnàng ală broă lơh, broă lơh bơceh lơh, geh cồng nha, ală krơh niam mpồl cau, cau dồ nă să gơguh jak, pơn rơ jak ngan. Pơn rơ jak pal là ală mpồl cau, cau dồ nă să kơlôi geh ală broă mờ uă cau ndai ờ hềt kơlôi tus, sơr lèt gan ală kal ke mờ uă cau ờ hềt sơr lèt gan; lơh geh ală broă mờ uă cau ờ kờñ lơh halà ờ lơh geh, geh bồ tơngoh kơlôi sơnơng bơceh lơh, khin cha kơlôi, khin cha lơh. Tàm pơrlòng pal pơgồp bal pà khà jờng, pà khà jờng di tŭ, pà khà jờng di pal ngan”.

Bơh pơrjum dờng tàm pơrlòng lơh tus geh bơh mpồl phàu crong dê tơngai bơh nam 2019-2024 dùl dơ̆ tai pà gŏ, kwang bàng, cau ling mpồl phàu crong càr Dăk Lăk mờ Dăk Nông, bulah ơm tàm khat dồ bơta lơi, rài kis lơi ndrờm yờ tơnguh uă nùs nhơm kăc màng, lam lài, duh rơngòt kơrnoat boh lam, dồ nùs dòn song, dră wơl mờ bơta ờ niam. Sơlơ kal ke bòl glar den mpồl phàu cròng sơlơ pal tàm pơrlòng tam gơl pa, bơceh lơh; pal lơh sir jak ngan gơnoar broă mpồl ling klàng tam lơh, mpồl ling klàng lơh broă, mpồl ling klàng lơh broă sa bơh mpồl ling klàng làng bol Việt Nam dê.