Tàm kông ty mai soh Lực Thiêm, gơwèt mpồl lơh sa mờ măi mok Tân An, ƀòn dờng Buôn Ma Thuột, nùs nhơm lơh broă tàm uă bơnah broă geh bơyai lơh ur ar ngan. Lŏ H’ Ly na Ayun là cau lơh phan tàm do yal, bơh bồ nam tus tŭ do, kông ty dờp geh uă pang sră dan blơi phan, khà priă nhai jờng rơ kung gơguh uă, nùs nhơm lơh broă pràn kơl dang ngan. Lŏ H’ Ly na Ayun pà git: “Kông ty mờ kông đoàn tàm tiah lơh broă neh tus bal drơng gàr niam ai cau lơh broă in bè jờng dùl nhai priă nhai tờm mờ pà phan ai cau geh cồng nha jăk ngan in. Kơ̆p kờñ kông ty geh bơtàu tơnguh rơlao tai nàng geh priă nhai mờ bơta kwơ niam rơlao tai”.

Tàm tiah lơh sa mờ măi mok Hoà Phú, ƀòn dờng Buôn Ma Thuột, rơlao 2 rơbô 400 nă cau lơh phan kung gam tàm pơrlòng lơh broă. Tàm tơngai do, mpồl pơrlòng ngui jơnau bơceh lơh, lơh niam bơta chài geh ală kấp kông đoàn lam lơh neh gơguh tiah lơh broă, tềm pềr phan lơh broă mờ di pal jơnau kờñ tam gơl pa bơta chài măi mok lơh broă. Tàm hơ̆, geh pơnrơ ngan là 2 broă bơceh lơh dra druh nhơm oxy ai geh bơnhă lơh lòs mờ ƀồm dà tơmù duh tàm bơnhă bơh cau lơh phan Lê Trung Hiếu, drơng broă lơh chài điện-bơnah broă lơh lòs gơwèt Kông ty Kổ phần lòs ASEAN, dong kờl tềm pềr cau lơh broă, tềm pềr ồs đèng mờ tơmù rềs àr. Bi Lê Trung Hiếu pà git: “Tŭ mŭt lơh broă tàm tiah do geh bơsram uă jơnau den broă lơh he dê ngai kung sơlơ bơtàu tơnguh sơl. Bơh tàm ală broă lơh mờng chài geh prăp sùm hơ̆, he hơ̆ sồng lơh geh ală jơnau bơceh lơh gơguh jăk bè hơ̆. Tŭ neh lơh geh ală cồng nha bè hơ̆ den he gŏ nùs nhơm gơlơh chờ hờp ngan, he geh dong kờl ală oh mi bal mờ gơ̆p bơyô lơh broă bal tàm broă lơh geh ƀuơn mờ niam rơlao”.

Mò Lê Thị Tuyết Hạ, Củ tịc Kông đoàn Kông ty Kổ phần lòs ASEAN pà git, Kông ty sùm sền gròi mờ ai tơl bơta niam nàng cau lơh broă, lơh broă niam lơngăp lơngai mờ pơrlòng tơnguh uă cồng nha lơh broă. Mò Lê Thị Tuyết Hạ pà git: “Bơta krơi is bơh broă lơh Hìu măi dê là lơh sa mờ măi mok dờng den sùm pal geh jơnau bơceh lơh pa. Hìu măi sùm geh jơnau kờñ nàng cau lơh broă in lơh ngan, sùm geh gùng dà broă lơh he dê là dùl hìu nhă den tàng cồng nha lơh broă geh tam pà bal, bơh tŭ hơ̆ kung ai geh bơta pràn nàng cau lơh broă lơh ngan lơh broă tŭ să tờm bal mờ mpồl cau lơh broă ndrờm lơh geh cồng nha”.

Ồng Trương Hồ Anh Hoàng, Phó kwang atbồ Mpồl atbồ ală tiah lơh sa mờ măi mok càr Dăk Lăk pà git, broă pơrlòng “Lơh broă jăk, lơh broă bơceh lơh” pơgồp bal mờ bơsram mờ lơh lơh broă jăt nùs nhơm, ơnà jăk, broă lơh Hồ Chí Minh dê neh lam lơh geh uă bơta geh, bơta ngăc ngar bơh kông ñân, viên cứk, cau lơh broă tàm ală anih lơh broă, mpồl lơh broă, mpồl lơh sa kă bro dê. Ồng Trương Hồ Anh Hoàng pà git: “Tàm tơngai tus, Mpồl Atbồ ală tiah lơh sa mờ măi mok càr geh lơh ngan pơgồp bal mờ ală sở, gah lơh broă nàng mblàng yal, lam sồr cau lơh broă, cau ngui cau lơh broă tus bal lơh broă ñhăp ñhar, tàm hơ̆ uă ngan là lơh uă broă lơh pơrlòng lơh broă ai cau lơh broă in”.

Tŭ phan lơh broă geh niam, priă geh kung gơguh sơl, ală broă dong kờl gàr niam, geh dong kờl kông ñân, viên cứk, cau lơh broă tàm càr Dăk Lăk iang nùs lơh broă, ñhăp ñhar lơh broă.

Lơh jăt ală broă pơrlòng kờñ gơboh mờ dà lơgar, Kông đoàn ală kấp tàm càr Dăk Lăk tơrgùm lơh jăt tơngu me pơrlòng nam 2024 pơgồp bal mờ broă pơrlòng “Lơh broă jăk, Lơh broă bơceh lơh”, “Pơlam broă jăk, drơng broă niam”; lam đoàn viên, cau lơh phan, viên cứk, cau lơh broă lơh ngan pơrlòng ngui geh cồng nha Broă lơh dùl tơlăk jơnau bơceh lơh, lơh pràn broă kơlôi sơnơng, ngui bơta chài măi mok pa, lơh pràn broă tơnguh cồng nha lơh broă. Bal mờ hơ̆, pơrlòng bơyai lơh geh cồng nha ală broă lơh drơng gàr bơta kwơ ai đoàn viên, cau lơh broă in, sền gròi, dong kờl di tŭ ală đoàn viên, cau lơh broă geh rài kis gơtìp kal ke; kĭ hơ bal ală broă lơh geh kwơ ai đoàn viên, ală broă lơh drơng gàr rài kis phan bơna mờ nùs nhơm, tài bơta kwơ mùl màl bơh đoàn viên, cau lơh broă dê.