Khà priă do geh ngui nàng lơh niam wơl gơl gùng jòng 11,4 kơi sồ lòt gan xã Dăk Plao, kơnhoàl Dăk Mil. Ală broă lơh niam wơl là bơnàng gùng, măt gùng, rơbòng tơlik dà bàr gah gùng mờ ñjrong yal, phan cih jơnau yal. Tơngai lơh tàm 6 nhai mờ geh lơh gơs tàm lồi nam 2024.

Ồng Bùi Văn Đoàn, Kwang atbồ Mpồl atbồ Rơndăp broă lơh sền gàr niam gùng lòt ù gờl gơwèt Sở Gùng lòt mờ pơn diang phan càr Dăk Nông pà git, tŭ do broă lơh kơl jăp wơl, pơn ring gùng neh geh ală mpồl lơh geh rơlao 10% khà broă lơh, gàr di tơngai geh ai. Gùng sồ 14C lòt gan càr Dăk Nông jòng rơlao 165 kơi sồ, bơh kơnhoàl Buôn Đôn, càr Dăk Lăk lòt tus jăt gah nhàr lơgar càr Dăk Nông tus kơnhoàl Bù Gia Mập, càr Bình Phước. Do là gùng kwơ màng dà lơgar dê, geh gơnoar kwơ màng bơtàu tơnguh lơh sa mpồl bơtiàn tàm tiah nhàr lơgar càr Dăk Nông, pơgồp bal tàm broă lơh geh cồng nha kơnòl broă sền gàr bơta lơngăp lơngai dà lơgar tàm tiah Tây Nguyên in.