VOV4.K’ho- Yal lài, tăc mờ lơgar ndai phan tàm dà qúy 2 nam do pơn jăt tai gơguh pràn mờ digơlan lơh geh 3 tơmàn dolar Mỹ kơnờm bơta gơguh tai pràn kơldang bơh ală bơta phan tàm dà tờm ngan tàm lồi qúy dùl mờ bồ qúy 2 dê. Priă geh bơh tăc mờ lơgar ndai phan tàm dà 4 nhai bồ nam do rlau 3 tơmàn 600 tơlak dolar Mỹ, gơguh tus 46,8% pơndrờm bal dùl tŭ mờ nam lài.

Jăt yal lài, tàm qúy 2, tăc mờ lơgar ndai phan tàm dà geh pơn jăt tai gơguh niam ngan tŭ ală bơta phan tàm dà tờm ngan, bè: ka ti ka tra gam ƀươn ngan bè drà blơi tàm ală drà lơgar Mỹ mờ Lo. Bơdìh hơ̆ tai, giă phan tàm dà gơguh bal mờ bơta ờ tơl uă ngan bè phan tàm dà tăc tàm drà dunia tài gơrềng bơh bơta kal ke đah Nga mờ Ukraine kung là tŭ niam uă ngan nàng gơguh tai priă geh bơh tăc mờ lơgar ndai ală bơta phan tờm ngan đơs is mờ tăc mờ lơgar ndai phan tàm dà đơs bal bơh Việt Nam dê.

Cau mblàng Lơ Mu K’Yến